2021-пи йисан 18-пи июлиъ Табасаран райондин ТIаттил гъулаъ яшамиш шулайи Асланбеговарин хизандиъ шадлугънан гьядиса гъабхьну – кюлфетдин кIул вуйи Асланбегов Мягьямедшафийин ва дугъан хпир Бикаханумдин 70 йис тамам хьпан юбилеяр ва сатIиди яшамиш шули 51 йис хьувал къайд гъапIну.
Мягьямедшафи Мямядагъаевич Асланбеговди мектебдин кьяляхъ Дербент шагьриъ айи педучилище ккудубкIну. Жигьил мялимди чан пишекарвалин рякъ ХустIларин бегьем дару кьялан мектебдиъ ккергъбан классариъ урхурайидариз дарсар кивувалилан ккебгъну. Кьюд йислан думу ТIиварин кьялан мектебдиъ ляхниъ дийи-гъуру: ккергъбан классариъ урхурайидариз дарсар киври, ва гьацира музыкайиан аьгъювалар туври, мектебдин художественный самодеятельностдин ляхинра кIули гъабхуз хъюгъру. Дугъан регьберваликкди мектебдин художествойин самодеятельностдин коллективди машгьур шаир Юсуф Базутаевдин «Бахтнан кьимат» кIуру драмайин спектаклра сягьнайиин дивнийи. Му серенжемдиъ Юсуф Базутаев учвра иштирак гъахьнийи, ва тамашичйири спектакль аьхю аьшкьниинди кьабул гъапIнийи.
1970-пи йис Мягьямедшафи Асланбеговдин уьмриъ кIваълан дяргъру гьядисйирихъди девлетлу йисси убчIвну. Думу Дагъгосуниверситетдиъ филологияйин факультетдиъ заочно вуди урхуз учIвнийи, хъасин эвленмишра гъахьнийи. Чан сумчир айи йигъан жигьилиз учв университетдиз урхуз кьабул апIбан гьякьнаан мялумат гъафнийи. Гьелбетда, швушв Бикаханумра жилирин хъуркьувалариин шад гъахьнийи.
Кьюд йисан ТIиварин кьялан мектебдиъ мялимди дилихну, Мягьямедшафи Асланбегов багъри ТIаттил гъулаз кьялан мектебдиз лихуз гъафнийи – мушваъ заан классариъ урхурайидариз урус чIалнанна литературайин дарсар киври, мектебдин художественный самодеятельностдин ляхинра кIули гъабхуз хъюгънийи.
Жвуван вазифйир гьаммишан намуслувалиинди тамам апIбаз ва ляхниъ заан хъуркьувалар гъадабгъбаз лигну, Мягьямедшафи Асланбегов райадминистрацияйин культурайин отделин, райондин образованиейин управление-йин терефнаан гьюрматнан грамотйирихъди лишанлу гъапIну, хъа 2019-пи йисан, гизаф йисари жигьил наслиз аьгъювалар ва тербия тувбаз лигну, «РФ-йин мярифатнан лайикьлу гъуллугъчи» лишниз лайикь гъахьну.
Мягьямедшафи Аслан-бегов, ужур пишекарси, аьхю хизандин кIулра ву. Чан уьмрин юлдаш Бикаханумдихъди яшамиш шули, дугъан улихьна йигъари 51 йис тамам гъабхьну. 2020-пи йисан мурари гъизилин сумчарра къайд гъапIну.
Асланбегова Бикаханум Гюлягьмедовнайи 2021-пи йисан 18-пи июли чан хизандихъди 70-йис хьпан юбилей къайд гъапIну. Думу 1951-пи йисан Табасаран райондин ТIаттил гъулаъ дявдин ветеран, офицер, «Уьру хяд» ва Ватандин дявдин II ва III дережайин орденарин сагьиб Къурбанов Гюлягьмед Гюлечевичдин хизандиъ бабкан гъахьну.
Бикаханум чпин миржир бицIир айи хизандиъ кьюрпирди бабкан гъахьну, ва думу чйирик варитIан аьхю-рра вуйи, гьаддиз бицIиди имидитIан риш дадайин асас кюмекчи гъахьну – гизафси чвйир-чйириз лигуб Бикаханумдиин алабхъну. Сифте ТIаттларин 8 йисандин мектеб, хъасин Хючнаарин кьялан мектеб ккудубкIну, риш сифте «Уьру пайдагъ» совхоздиъ, хъасин Хючнаарин халачйирин фабрикайиъ атIнар ургърурди гъилихну.
1970-пи йисан думу мираслин бализ швушвди гъушну ва гъийин йигъазкьан дугъахъди сатIиди яшамиш шула. Гьамусяаьт Бикаханум Асланбегова пенсияйиъ а, думу зегьметнан ветеран ву. Мугъаз гьацира «Игит баб» кIуру ччвурра тувна, фицики жилирихъди сатIиди дугъу 4 байна 3 ришра дюрхну, арайиз адагъну, вари эвленмиш гъапIну. Гьамусяаьт мурариз 27 хтулна сар гудул а.
Асланбеговарин хизандиъ духтрар, мялимар, маларин духтрар, бухгалтерар, спортсменар, бизнесменар, устйир а. Аьхюну риш Гюльяназ ва бай Рафис медицинайиъ цирклиъ лихура, Минафиз, политехнический институт ккудубкIну, алверихъ хъа, Маликди мал-духтурвал апIура, Венера, гагайин пише кадабгъну, ТIаттларин кьялан мектебдиъ мялимди лихура, Расули, юриствалин ва экономиствалин пишйир гъадагъну, полицияйиъ гъуллугъ апIура, думу хьуб жюрейин спортдин устадра ву.
Асланбеговарин баяр-шубар чпин хизанарихъди Мягьячгъалайиъ, Каспийскдиъ, Дербентдиъ ва Ульяновск шагьрариъ яшамиш шула.
Учу Асланбеговарин хизандин вакилариз жандин мюгькам сагъ’вал, кIван шадвал, веледарилантина аьхю ужувлар хьуб ккун апIурача.
Шиклиъ Мягьямедшафи ва Бикаханум Асланбеговар ккуни веледарин арайиъ.
