Июндин 1-диан 30-дизкьан Санкт-Петербург шагьрин администрацияйи «Комсомольская правда» редакцияйихъди сатIиди «Петербург шагьрин йисандин духтур – 2021» конкурс кIулиъ гъубхну. Му конкурс шагьриъ гъягъюрайи варитIан асас вуйи, яркьу конкурсарикан саб ву. Гьар йисан кIули гъябгъру серенжемдиъ Санкт-Петербург шагьрин гизаф вазифйир гьуркIру медининацинайин «МСЧ-157» Центриъ 2016-пи йисхъан мина урологди лихурайи ихь ватанагьли, Табасаран райондин Ругуж гъул’ан вуйи Мурад Ражабовра (шиклиъ) иштирак гъахьну, ва дугъу натижайиъ сабпи йишвра гъибисну.
Къайд апIуб лазим вуки, медуниверситет ккудубкIбалан кьяляхъ душв’ан «МСЧ-157» тешкилатдиз гьау 27 касдикан 3 этапдиъди гъубшу читин конкурсдин натижайиъ ляхниз анжагъ Мурад РажабовтIан гъадагъундайи. Ихь бажаранлу ватанагьлийи гьаддихъан мина му центриъ ляхин апIура, хъа 2017-пи йисан, ультразвукдин (УЗИ) кюмекниинди иццрушин аьгъю апIувалин курсарра ккудукIну, аьлава пишера гъадабгъну.
Мурад Ражабов «Петербург шагьрин йисандин духтир – 2021» конкурсдиъ гъалиб хьувалин хабар гъурубкьган, учу дугъахъди телефондиан гаф-чIал гъапIунча. Жигьил духтрин гафариинди, конкурсдиъ иштирак гъахьидар асас вуди ужуб тажруба айи ва чпи апIурайи ляхниз жямяаьтлугъдин терефнаан ужуб кьимат гъазанмиш дапIнайи пишекрар вуйи.
«Дюзди гъапиш, конкурсдиъ иштирак хьуз планариъ адаййиз. ЦIиб улихьнаси узу лихурайи медицинайин цирклин бязи месэлйирикан илмин макьала гъибикIнийза. Думу макьала узу лихурайи клиникайин кIулин духтриз кьабул гъабхьнийи ва дугъу чав, узу конкурсдиъ иштирак хьпан бадали, йиз документар тешкиллувалин комитетдиз хътаънийи. Конкурс, дидин иштиракчйириз аьдати инсанари сесер тувбиинди кIули гъубшнийи. Вушра натижайиъ гъалибчйир ужуб тажруба айи духтрар-экспертари гъядягънийи… Хъа конкурс хьайиз улихьна дидиъ иштирак шулайи духтрарихьан «Комсомольская правда» редакцияйиан интервью гъадабгъуз ва шиклар йивузра гъафнийи»,
– ктибтнийи учуз Мурад Ражабовди.
Духтирвалин тажрубайин йисар гизаф даршра, Мурад Ражабов гъийин йигъаз хайлин гьюрматнан грамотйириинди лишанлу дапIна, дугъу чан пишекарвалин дережа гьаммишан за апIурайивализ лигну жюрбежюр сертификатар, дипломар гъадагъна. Гьаму далилари ва, гьелбетки, жвуван вазифйирихьна аьхю жавабдарвалиинди янашмиш хьували, ккуни ляхниз вари кьувватар сарф апIували дугъаз «Петербург шагьрин йисандин духтур – 2021» кIуру гьюрматнан ччвур гъазанмиш апIуз кюмек тувну.
«Табасарандин нурар» редакцияйин терефнаан учу ихь бажаранлу ватанагьлийиз хъанара артухъ хъуркьувалар ккун апIурача. Гъит, ихь халкьдин арайиъ мицисдар жигьилар артухъ ишри!
