Жиниб дар, 2018-пи йисхъан мина Дагъустандиъ региондин экономикайинна аьтрафарин артмиш’валин министерствойи конкурсдин жюрейиинди «100 мектеб» ва «Ерли жягьтлувалар» проектар уьмриз кечирмиш апIура. Гьар йисан кечирмиш апIурайи проектарин конкурсдиъ республикайин муниципалитетариан хайлин аьрзйир тувра.

 

Къайд дапIну ккундуки, ккудушу йисарин арайиъ, республикайин имбуну районарихъди тевиган, проектарин конкурсдиз варитIан гизаф аьрзйир Табасаран райондиан тувнайи. Магьа ццира «Ерли жягьтлувалар» проекдин конкурсдиз хъадаънайи 8 проектариан 4 проектдиз (ТIаттларин гъулаъ бицIи футболин майдан дивуз, бицIидарин лагерь вуди гъабхьи дарамат, Кьалухъ Мирзайин ччвурнахъ хъайи спорткомплексдин ва Улуз гъулан культурайин Хулан ремонт апIуз) грантар тувну. Хъа «100 мектеб» проектдин конкурсдиз райондиан 4 мектеб гъядягъну. Дурарин арайиъ Гувлигъарин, Гьемшнигъярин, Цухтигъярин ва ЦIийи Лижв’арин кьялан мектебар а. Расвалин ляхнар тамам апIру подрядчик сарун гъядягъна ва багарихьди думу ляхнарихъ хъюгъди кIури, Табасаран райондин администрацияйин пресс-гъуллугънаан хабар тувра.

Гъябгъюрайи йисан «Образование» нацпроектдин дахилнаъди РД-йин илимдинна образованиейин министерствойи их региондиъ 6 проект уьмриз кечирмиш апIиди: «Гьамусдин мектеб», «Гьарсар бицIирин хъуркьувал», «Образованиейин цифрайин гъурулуш», «Жигьил пишекрар», «РФ-йин ватандашариз ватанпервервалин тербия» ва «Яшайишдин терефнаан жанлувал».

Ведомствойиъ мялум гъапIганси, «Гьамусдин мектеб» проектдин дахилнаъди гъуларин ва бицIи шагьрарин мектебариъ (43 муниципалитетдиъ) «Точка роста» кIуру образованиейин гьамусдин 170 центр тешкил апIиди. Дурар школьникариз пише ктабгъбаъ улихь ккимиди кюмек тувуз, мялимариз чпин пишекарвал за апIуз ва материалинна техникайин база гьамусдин деврин тIалабариз жаваб тувруганси цIийи алапIуз диш дапIнайидар ву.