Дагъустандиъ саб бязи гъатар агьалйириз чарасуз вуди коронавирусдиз аькси рубар йивувал тасдикь дапIна.
Мициб къарар адабгъуз республикайин кIулиъ айидар къурхулу уьзриан иццрударин кьадар артухъ-артухъ шулайивали мажбур гъапIну. Гьаддин гьякьнаан Дагъустандин кIулин санитарный духтир Николай Павловдин тялукь постановлениейиъ дупна.
Документдиз асас вуди, сагъламвал уьбхбан, образованиейин, яшайишдин, транспортдин, алверин цирклариъ лихурайи гъуллугъчйириз, ЖКХ-йин идарйириъ, МФЦ-йириъ, почтайиъ, банкариъ, столовйириъ, фитнес-клубариъ лихурайидариз, государствойин ва муниципалин гъуллугъчйириз коронавирусдиз аькси рубар йивуб чарасуз лазим ву. Гьаму сиягьнак гьацира культурайин ва спортдин серенжемар тешкил апIурайидар ва бицIидарихъди ляхин апIурайи агьалйир кахьра.
Документдиъ дупнайиси, чарасуз вуди рубар йивувал 18 йистIан артухъ яшар духьнайи образованиейин пишекарвалин тешкилатариъ ва вузариъ урхурайидаризра кайиб ву.
Республикайин кIулин санитарный духтрин къарарниинди, вакцинайин сабпи руб зиихъ кудухнайи гъатариз дахил шулайи дагъустанлуйири 9-пи августдиз, хъа кьюбпи руб – 30-пи авгъустдиз йивну ккунду.
Улихьнаси тялукь къарарар Москвайин, Подмосковьейин, Тувайин, Ленинградский, Тверской, Кемеровский, Свердловский, Смоленский, Тамбовский областарин ва хъана жара регионарин улихь-кIулихь хьайидарира адагъну.
Гьаддихъди сабси, му къарари регионарин ва федералин гьюкмин органар жара апIбахъди бязи суалар арайиз хура. РД-йин Правительствойиз федералин центрин гюзчиваликк ккайи тешкилатарин гьякьнаан къарар адабгъуз ихтияр адар. Дурариз гуж апIуз, наразивал улупурайи бязи предпринимателар административный жавабдарвалихъна хуз анжагъ Роспотребнадзорихьан шулу. Мумкин ву, му къарар тамам апIбиина Дагъустандин МВД-ра жалб апIуб.
Мидланра савайи, ихь республикайиъ жюрбежюр карханйириъ лихурайи инсанар официально вуди ляхниз гъадагъну адру дюшюшар гизаф айивалиан, ляхнин эйсйирихьан дурарин гьякьнаан мялуматар тIалаб апIбаъра читинвалар алахьиди.
Гъи дюн’яйиъ вари инсаниятдиз кайи гъагъи гьял арайиз дуфна. Гьаддиз, сабишв’инди думу терг дапIну, дид’ин гъалиб хьпан бадали, чиб-чпиз кучIлар дарапIди, дидин гьякьнаан адагъурайи къарарарихьна, кьабул апIарайи уьлчмйирихьна ухьу гьарсар аьхю жавабдарвалиинди янашмиш хьуб чарасуз ву.
