ЦIийи китаб
Аьхиримжи йисари, табасаран литература мектебариъ аьгъю апIбан методикайин пособйир ва теклифар кайи китабар тек-бирра чапдиан адаури имдар. Мектебдин программйириъ бабан чIалназ ва литературайиз улупнайи сяаьтар цIиб хьувалихъди сабси, илмин аьхиримжи хъуркьувалар ишлетмиш апIури, гъийин деврин методкйириин биналамиш духьну дюзмиш дапIнайи, кIулди вуйи табасаран шаирарин, писателарин эсерар аьгъю апIбан пособйирра удучIвури имдар, ва мялимар жвуван кьувватариинди арайиз дуфнайи читин агьвалатнаан удучIвуз мажбур шула.
Гьаддиз, ДГПУ-йин урхбанна методикайин советдин къарарниинди, Дагъустандин халкьдин писатель Шагьвелед Шагьмардановдин яратмиш’валар ахтармиш апIбаз бахш вуйи, «Гафнан сюгьюрлу кьувват» ччвур тувнайи урхбанна лигбан пособие чапдиан адапIувал, зиихъ къайд дапIнайи аьгьвалат сацIибкьан ужу алапIбаз алдабгъу гамси гьисаб апIуз шулу.
Пособие дюзмиш гъапIур дагъустан филологияйин факультетдиъ табасаран литературайин дарсар киврайи аьлим Аьлибег Аьшурбегов ву. Китабдин метлеб – дагъустан литературайин машгьур вакил Шагьвелед Шагьмардановдин уьмрин ва яратмиш’валин рякъ вари терефарихъанди ачмиш апIувал ву.
Китаб шубуб пайнакан ибарат дубхьна «Ш.Шагъмарданов дагъустан литература ахтармиш апIбан илмиъ» кIул иливнайи сабпи пайнаъ Ш. Шагьмардановдин жюрбежюр эсерарин анализ дапIнайи, дугъан яратмиш’валариз уьмуми кьимат туврайи табасаран аьлимарин илминна методикайин макьалйир, шаирин кIулди вуйи эсерариина ясана удучIву китабариина табасаран ва дагъустандин имбу халкьарин шаирари, писателари гъидикIу сифте гафар ва рецензйир, дугъан уьмрикан, яратмиш’валарикан вуйи ва улихьган журналариъ, газатариъ чап гъапIу макьалйир, интервьйир, очеркар, шаириз бахш дапIнайи шиърар тувна. Дупну ккундуки, китабдиъ материалар гьам урус, гьам табасаран, гьам имбу дагъустан чIалариинди, — авторари дурар фици гъидикIнуш, гьаци тувна.
Кьюбпи пай чав, Ш. Шагьмардановди – китабарин ва «Ппази» журналин редактори, журналистди, илмин гъуллугъчийи – гъидикIу жюрбежюр публицистикайин макьалйирикан, рецензйирикан, поэзияйин китабарихьна гъидикIу сифте гафарикан, урхбанна методикайин макьалйирикан, машгьур касарин, шаирарин юбилеяриъ гъурху докладарикан ва гь.ж. ибарат дубхьна.
Китабдин аьхиримжи пайнаъ, Ш.Шагьмарданов жюрбежюр тешкилатариз кьабул апIбан бадали М.Шамхаловди, Ш.Къазиевди, М. Митаровди гъидикIу кагъзар-теклифар, шаирин юбилеярихъди аьлакьалуди дугъан ччвурнахъ хътау тебрикар, дугъаз туву жюрбежюр пешкешарин, гьюрматнан грамотйирин, удостоверенйирин, медаларин шиклар тувна.
Шак адар, цIийи китаб литература ахтармиш апIурайи аьлимариз ва студентариз-филологариз, мектебдиъ табасаран литература киврайи мялимариз, ва гьацира табасаран литературайиин юкIв али аьдати ватанагьлийириз ужуб кюмек ва багъиш хьибди.
