Вахтназ вуди Дагъустандин Главайин вазифйир тамам апIурайи Сергей Меликовди Дагъустан Республикайин Конституцияйин Йигъан республикайин лайикьлу ватандашар государствойин пешкешар ва премйир тувбиинди лишанлу гъапIну.
Гьаци 20-рилан зиина образованиейин, сагъламвал уьбхбан, культурайин, спортдин ва жара цирклариъ зегьмет зигурайи ватанагьлийир лайикьлу пешкешарин сагьибар гъахьну. Гьадрарин арайиъ ихь ватанагьлийирра айивал аьхю разивалиинди къайд апIурача.
Дагъустан Республика экономика ва яшайиш жигьатнаан артмиш апIбак аьхю пай кивбаз лигну, республикайин правительствойин председателин сарпи заместитель, ихь ватанагьли Нюсрет Уьмаров медалиинди лишанлу гъапIну.
Гьюкуматдин Табасаран драмайин театрин директор Аьлимурад Аьлимурадов ва Республикайин халкьдин яратмиш апIувалин Хулан отделин кIули айи Минажат Мурадова «Дагъустан Республикайин культурайин лайикьлу гъуллугъчи» ччвурар тувбиинди лишанлу гъапIну.
Жигьил наслиз ужудар аьгъювалар ва ватанпервервалин тербия тувбаз лигну, Цухдигъарин кьялан мектебдин мялим Аьбдужелил Асланов ва Хив райондин Лика гъулан агьали Саади Ражабов Амет-Хан Султандин ччвурнахъ хъайи «Артмиш шулайи наслариз ватанпервервалин тербия тувбаз лигну» медалариз лайикь гъахьну.
Табасаран райондин Жулжагъ гъулан глава Шагьимерден Гьясанаваев – РД-йин Главайин Чухсагъулин кагъзиинди, ТIивак гъулан агьали, меценат Гьяжимурад Гьяжиев – Гьюрматнан грамотайиинди, Къужник гъулан агьали ФатIимат Истарханова – Дадайин ордендиинди лишанлу гъапIну.
Редакцияйин коллективдин терефнаан ихь ватанагьлийир му заан пешкешарихъди кIваантIан мубарак апIури, дурариз гележегдиъра халкь ва ватан бадали зигурайи баркаллу ляхниъ хъана аьхю хъуркьувалар хьуб ккун апIурача.
Дагъустандин Глава Сергей Меликовди РД-йин Конституцияйин Йигъан государствойин пешкешарихъди ва премйирихъди лишанлу гъапIдарин арайиъ ихь ватанагьли Минажат Мурадовара а.
Минажат Рягьимовна Мурадова Табасаран райондин Дагъни гъулаъ бабкан гъахьну. Мектеб ккудубкIбан кьяляхъ дугъу ДГУ-йиъ филологияйин факультетдиъра заан аьгъювалариз урхуру.
Чан зегьметнан рякъ Минажатди 1990-пи йисан Туркменский ССР-ин Ашхабад шагьриъ Пролетарский райондин образованиейин отделин инспекторвалилан ккебгънийи. 1992-пи йисан Теджен шагьриъ 6-пи нумрайин мектебдиъ урус чIал ва литература кивру мялимди лихури гъахьну. Ярхла юрдариан багъри ватандиз чан хал-хизандихъди хъадакну гъюбан кьяляхъ, 2001-пи йисан январь вазлиъ Минажат Республикайин халкьдин яратмиш апIувалин хулаъ (РДНТ) ляхниъ дийи-гъуру. Гьамусяаьт Минажат Мурадовайи гьадму идарайин ляхнин варитIан асас терефарикан саб кIулиъ гъабхурайи халкьдин яратмиш апIувалин отделиз – душваз театрин, циркдин, хореографияйин, хорин, милли мукьмар йивру алатарин, бицIидарин ва хизандин художествойин яратмиш апIбарин жанрар дахил шула – регьбервал тувра.
Чан ляхниъ дугъу Дагъустандин гизаф миллетарин аьдати культурайин, фольклорин ирс уьбхбак ва думу артмиш апIбак лайикьлу пай кивра.
Дагъустандин шагьрариъ ва районариъ Минажат Мурадовайин иштиракниинди республикайин художество-йинна яратмиш апIувалин хайлин проектар уьмрин гьяятназ кечирмиш апIура. Дурарин арайиъ жюрбежюр жанрарин фестивалар, серенжемар ва конкурсар а. Мисалназ «Масленица», «Йиз халкьдин мяълийир ва ялхъвнар», «Дагъларин сес», «Самурин чвул», «Шалбуздагъдин гьенгар ва мукьмар», «Пягьливнар», «Дагъустандин хизан», «Дагъустан – йиз хизан», «Рубасдин мукьмар» ва хайлин жарадар улупуз шулу. Халкьдин яратмиш апIбарин отдели республикайин бицIидарин яратмишвалихьна гьевес артмиш апIбан конкурсар ва серенжемар – «Кьямкърин чирккв», «БицIидарин ватан», «Кавказдин гъизилин хядар», «ДерккучIимир», «БицIи дагълуйир» ва гь.ж. – гьар йисан гъахувал аьдатнаъ ипна. Гьаму жюрейин культурайин акцйир тешкил апIували Минажат Рягьимовнайин милли культурайихьна, халкьарин аьдатарихьна вуйи мани рафтарар субут апIура. Хъа бицIидарин яратмиш апIбарин проектар – му гележегдин миллетарин арайиъ ижми дуствализ ва культурайин аьлакьйириз мюгькам шибритI ву.
Гьар йисан республикайиъ гъахурайи аьдати культурайин «Цамаури» фестиваль, вари халкьарин фольклорин, театрарин ва аьдати культурйирин «Дагълуйир» фестиваль, «Каспий – дуствалин гъирагъ», «Аьдатарин театр», «Урусат – узуз уву ккундузуз», «Халкьдин палатдин поэзия» ва жара фестивалар, региондин художествойинна яратмишарин проектар, конференцйир, совещанйир тешкил апIбаъра Минажат Мурадовайи жанлу иштираквал улупура.
Республикайин культурайин артмиш’валик лайикьлу пай кивбаз ва баркаллу зегьмет зигурайивализ лигну Минажат Мурадова РФ-дин культурайин ва махлукьатлу коммуникацйирин министерствойин терефнаан, Дагъустан Республикайин Главайин ччвурнахъан, РД-йин Правительствойин, РД-йин культурайин министерствойин терефариан гьюрматнан грамотйириинди ва багьалу пешкешариинди лишанлу дапIна.
«Табасарандин нурар» газатдин редакцияйин коллективди Минажат Мурадовайин «РД-йин культурайин лайикьлу гъуллугъчи» ччвур тебрик апIури, дугъаз сагъ’вал, лихуз хъана артухъ аьшкь ва гележегдиъ мутIан заан хъуркьувалар ккун апIура.
