Улихьна йигъари, кьисмат дубхьну, йиз багъри НичIрас гъулаз алдахъунзу. Гъул’ан удучIвну душну 20 йис вушра, йиз гьамусра душвак юкIв кабсну амийиз.
Гъулаъ учIвубси, сабпи нубатнаъ уларикк ккабхъруб цIийи мектебдин уччвуб дарамат ву. Амма, гъул бицIиб даршра, кючейиъ гьич сар бицIиркьан алахъундариз. Мюгьталра гъахьунзу, нашийкIа йиз гъуландар, кIури?! Хъа вуйиштIан, гъулаъ яшамиш шулайи инсанар думукьан имдар.
Мектебдикан улхури пуз ккундузуз, думу ачмиш дапIну, сарун шубудпи йис вушра, амма гьелелиг мектебдин гьяят ккабалгнадар. УкI гъедебгну, диди мектебдин гьяят вари ккапIна. Хъа йиз фикриан, му гьялназ цIийи мектеб дубхну ккундайи. Гьаз гьамусра мектебдин аьтрафар къайдайиз духнадарш, аьхю суал ву. Умуд кивраза, багарихьди му месэла гьял дапIну ккудубкIур, кIури.
Мектебдихьан тина яваш-явашди «Гъулан шид» латарихьна хъуркьунза. Мушв’ин илимбудар латIар ву пузра шулдар. Дина гъюрайи штун цIадлихъ хъайи гъуландарин нубат гъябкъиган, мюгьтал гъахьунзу. Йигъ-йишв дарпиди, инсанар штун нубатнахъ дийигъну, чпин бедрйир, гварар, бак-лажкйир ацIри а. Лигру гьялариан, ничIрасар штухъ мюгьтаж духьна. Набши мина гъюрайи шид? Саб гьаму латар ваъ, хъа гъулаъ айи вари штун кIуларин гъюрайи шид хъимдарди, турбйир деерццна. Гъулаъ шид имдрувалин тахсиркар фуж ву? Му месэлара гьял апIур кIури, райондин администрацияйикси, гъулан поселениейин администрацияйик ва гъуландарик умуд кивраза. Фицики шид адарди яшамиш хьуз читинди ву. Дагълу рес-публикайин дагълу гъулариъ шид адрували мюгьтал апIуру.
Гъулан латарихьан цIиб исинаси жиларин гимхьа йишв хьа. Аммаки гим’ин дийигънайир анжагъ сар кастIан дайи. Лигруган, гъулаъ хулар гизаф ади рякъюру, амма, гьяйифки, дурарин аьхюнуб пай ичIидар ву. Хъа инсанар адру ичIи хулар цIиб вахтналан ахьру. Гьаци НичIрасра хайлин хулар ахьна. Гъябкъиган, фикир шулу, аварарин Гамсутль гъул вуйкIан, кIури. Гъулаъ жигьилар зат рякъюри имдар, чпин кьабидарра дурари яваш-явашди чпихьна шагьрариз гъахура. Гьаддиз гъулра лап бицIи шула.
Газатдин редакцияйиз Хив райондин Атрик гъулан агьалийи кми-кмиди «Гьаз Хив райондин гъулар ккадахьура, хъа Табасаран райондиъ дициб аьгьвалат адар?» кIури, бикIури шулу. Ав, думу дюз ву. Хив райондин гъулар бицIи гъулар вуйиган, дурар ухди ккадахьдарси рякъюру, хъа Табасаран райондин аьхю гъуларикан саб, 150 хизан яшамиш шулайи НичIрас гъулаъ имбудар анжагъ 50-60 хизантIан дар, янаки гъулан аьхюнуб пай жара йишвариз кюч дубхьна. Мура гъул ккадабхъурайивалик гьисаб даринхъа? Сад-кьюд йис хьайиз, мушваъ имбударра удучIвну гъягъиди.
Гьюрматлу ватанагьлийир! Ичв багъри гъулар уьрхьяй. Гъулан мяишат артмиш апIури, аьгьваллуди яшамиш хьуз ихь гъулариъ фукьан вушра мумкинвалар а. Зат тIагъру дарапIди ичв жилариин лихури, гъазанмиш апIуз чалишмиш йихьай. Закур, гъул имдру йигъан, швумал хьидичва. Гъул имдрувал дада имдрувалик гьисаб ву.
Шиклиъ: НичIрас гъулан йирси хулар.
