Хьадан тятIиларин вахт улубкьиган, мектебар рас апIувалин ляхнар кIули гъахури, аьдатнаъ абхъна. Ав, урчIвуб вазли баяр-шубари аьгъювалар гъадагъури гъахьи мектебар цIийи урхбан йисаз чарасуз рас дапIну ккунду. Ухьуз аьгъю-ганси, мектебарин рас апIувалин ляхнар гизафси август вазли ккергъру. Дюз гъапиш, думуган хъюгъну кIури, мектебар капитально рас апIувалин ляхнар урхбан йис ккебгъайиз ккудукIуз шулдар. Хъа гьяк йивувал, шир ктатувал ва жара жизби ляхнар кIули гъахуз шулу.
Табасаран райондин мектебар цIийи урхру йисаз баяр-шубар кьабул апIуз фици гьязур шулаш, аьгъю апIуб метлеб вуди, улихьна йигъари ич мухбир Ражаб Нуровди Табасаран райондин образованиейин управлениейин начальникдин заместитель Ринат Мирзабалаевдихъди сюгьбат гъубхну. Дурарин сюгьбатнан асас мяна жикъиди исихъ туврача.
– Табасаран райондиъ 59 мектеб а, гьадму мектебариъ гъийин йигъаз 8000 урхурайири аьгъювалар ва тербия гъадабгъура. Цци сабпи ражари сабпи классдиз 800-дихьна бицIидар гъягъиди. Урхурайидариз ужудар аьгъювалар гъадагъуз, спортдиин машгъул хьуз, культура жигьатнаан артмиш хьуз, дурариз ужуб тербия тувуз ра-йондин руководствойи, мектебарин директорари, мялимари чпихьан удукьру вари шартIар гьязур апIура.
Табасаран райондиъ 58 мектебси, 37 бицIидарин багъ ва аьлава образование тувру 7 тешкилат а. Вари мектебарикан 52 кьялан уьмуми образованиейин, 5 бинайин уьмуми аьгъювалар тувру ва 1 ккергъбан образованиейин мектебар ву, – ктибтну образованиейин управлениейин вакили.
Ринат Мирзабалаевдин гафариинди, образованиейин улупнайи вари идарйириъ хатIасузвалин паспортарра кьабул дапIна, вари йишвариъ гъаравларра дерккна. Образованиейин гьарсаб идарайиъ цIийи урхбан йис ккебгъайиз кIули духну ккуни серенжемарин планарра гьязур дапIна. Дидихъди сабси, бицIидар кьабул апIури, дурарихъан жавабдарвал гъабхру руководителра кIулиъ ади, вари терефарихъанди бицIидарин сагъ’вал уьбхбан ва хатIасузвалин тIалабар тамам дапIну ккунду.
Райондиъ образование-йин цирклиъ саб жюре читинваларра алахьура. Гьадму гьисабнаан, хайлин мектебариъ жюрбежюр предметариан мялимар гьуркIрадар. Асас вуди математика, химия, физика, информатика кивру ва харижи чIаларин мялимар.
– Думу месэла «Земский мялим» программайиз асас вуди гьял апIуз чалишмиш шулача, – гъапнийи Ринат Мирзабалаевди ва образованиейин цирклиз райондин администрацияйи, хусуси вуди райондин глава Мягьямед Къурбановди аьхю фикир туврайивал, образованиейин месэлйир гьарган дугъу чан гюзчиваликк гъитрайивал къайд гъапIнийи.
ЦIийи коронавирусдин инфекция тарабгъуз гъидритбан ва дидин улихьишв бисбан метлеб ади гьаму улихьна йигъари гъабхьи оперативный штабдин заседаниейиъ мялум гъапIганси, мялимари ва жара жавабдар гъуллугъарин вакилари аьгъювалар тувбан гидишат «маскйирин режим» тамам апIури, кIули дубх- ну ккунду. Гьацира главайи оперштабдин заседаниейиъ мектебар дезинфекция апIру дакьатарихъди, СИЗ-арихъди тямин дапIну ккуниваликан гъапну.
Улубкьурайи цIийи урхбан йисахъди ихь райондин вари урхурайидар, мялимар тебрик апIури, дурариз цIийи урхбан йис саб жюрейин манигъвалар адруб хьуб ккун апIурача.
