3-пи августди Дагъустан Республикайин кIулиъ айирин вазифйир вахтназ вуди тамам апIурайи Сергей Меликовди республикайиъ коронавирусдин инфекция тарабгъбаз аькси вуйи Оперштабдин нубатнан заседание кIули гъубхну.
Региондин кIулиъ айири къайд гъапIганси, духтрарин улупбариинди, йигълан-йигъаз аьзарлу шулайидарин кьадар артухъ шула: гьар йигъан инфекция кубчIвбан 200-205 цIийи дюшюшар арайиз гъюра, коронавирус ва пневмония кади йигъан 450 кас больницайиъ ккаъра. Майдин гьацIариъ гьаму улупбар республикайиъ 40-50 кас вуйи.
Гьамдихъди аьлакьалу вуди, республикайин вахтназ вуди кIулиъ айири гъапиганси, сагъламвалин гъурулушдиз артухъ-артухъ гъагъ алабхъура – майдин гьацIариан хъюбгъну, аьзарлуйирин кьадар 8,5 ражари артухъ гъабхьну. Дугъу гьацира аьзарлуйир ккаъру йишварин кьадар 20 проценттIан цIиб дарди гьязур апIбан гьякьнаанра гъапну. Гьаму метлебариз Республикайин бицIидарин больницайиъ 50 йишв, хъа «РЖД-Медицина» клиникайин больницайиъ 40 йишв гьязур дапIна.
Асас фикир Сергей Меликовди уьзур гъагъи ва лапра гъагъи жюрейиинди кубчIврайидарин кьадар артухъ шулайивалихьна жалб гъапIну.
Гъи дицдарин кьадар 1700 кас ву – больницйириъ ккаънайидарин кьадарнакан 30 процент. Натижайиъ кислороддин лазимвал артухъ шула, гъи думу суткайиъ 29-30 тонна герек ву. Мициб аьгьвалатнахьна вари медучрежденйир гьязурди дар. «Кислород жара регионариан хуз хъюгъну ккунду. Республикайин правительствойикан, жанлу духьну, сагъламвалин тешкилатар лазим вуйи кьадарнаъди кислороддихъди тямин апIбан гьякьнаан ухди уьлчмйир кьабул апIуб ккун апIураза», – гъапну Меликовди.
Заседаниейиъ гьацира къайд гъапIганси, уьзриан йихурайидарин кьадар лапра зарбди артухъ хьуз хъюбгъна – кьюд йигъандин арайиъ инфекцияйиан 31 кас кечмиш гъахьну.
Мициб аьгьвалатнан себебарра мялум дарди дар – вакцинация явашди гъябгъюрайивал ва тасдикь дапIнайи уьл-чмйир вариди сабишв’инди уьрхюри адрувал.
«Гъагъиди кетIерццнайидарин арайиъ уьзриз аькси руб йивбаан, эгер жара гъагъи уьзур ктарш, больницайиъ ккаъдар саркьана адар. Гъи сумчрар шагьрарин банкетный залариан районарин залариз кюч шула. Мицдар, уьзур артухъди тарабгъуз гъитрайи дюшюшар, фукьан ухди ухьу арайиан адагъуз хъюгъиш, гьаддилан инсанарин уьмур ва сагъламвал асиллу шула. ВаритIан гучI’вал туврайиб – йихурайидарин арайиъ жигьиларра а!» – илтIикIну региондин глава муниципалитетарин кIули айидарихьна ва цIийи урхбан йис ккебгъайиз чарасуз вуди вакцинация гъабхуваликан кIваин гъапIну.
Главайи къайд гъапIганси, му терефнаъ ужувлан дигиш’валар хьуз хъюгъна. Июлин вазлиъ 100 агъзурилан зиина ватанагьлийири рубар гъивну, кьялан гьисабниинди – йигъан 3 агъзур касди. Гьаддихъди сабси, республикайиз жюрбежюр вакцинйирин 297 агъзурилан зина дозйир духна, хъа вакцинация гъабхбан бадали тешкил дапIнайи пунктариъ гьар йигъан 14 агъзурихьна инсанар кьабул апIуз мумкинвал а.
Заседаниейиъ къайд гъапIганси, агьалйирихьан вакцинацияйихьан отказ апIузра шулу, хъа гьадму вахтна дурар апIурайи ляхнихьан азад апIиди. Ляхнин аьхюри тялукь актниинди дицдар гъуллугъчйирин сиягь гьязур дапIну, вакцинация гъабхбан вахт ва ляхнихьан азад апIбан себеб тасдикь апIиди.
