Табасаран райондин мектебариъ чпин лайикьлу зегьметниинди адлу гъахьи мялимар хайлин а. Дурарикан сар ТIаттларин кьялан мектебдиъ хайлин йисари лихурайи математикайин дарсар киврайи мялим Мягьямедов Къирхлер Шерифович (шиклиъ) ву.
Къирхлер Мягьямедов 1963-пи йисан 16-пи августди ТIаттил гъулаъ бабкан гъахьну. 1980-пи йисан дугъу ТIаттларин кьялан мектеб заан хъуркьувалариинди ккудубкIну. 1985-пи йисан Азово-Черноморский гъулан мяишатдин механизацияйин институт ужудар аьгъювалар ади ккудубкIу жигьил пишекри, чан зегьметнан рякъюъ садпи гамар 1988-1991-пи йисари Къизлар райондин Черняевка гъулаъ 15-пи нумрайин ПТУ-йиъ мялимди лихури, алдагъуз хъюгъну. 1991-1996-пи йисари Ягъдигъарин кьялан мектебдиъ ляхин апIури гъахьну. 1996-пи йисхъанмина гъийин йигъазкьан ТIаттларин кьялан мектебдиъ мялимди лихура.
2000-пи йисан ДГПУ-йин математикайин факультет ужудар аьгъювалар ади ккудубкIну. 2016-2019-пи йисари Акъуарин кьялан мектебдиъ, хъа 2019-2020-пи йисари Табасаран райондин гимназияйиъ математикайин дарсар кивру мялимдира лихури гъахьну. Дарсарин кьяляхъ институтарик кучIвайиз математикайиан заан аьгъювалар гъадагъуз ккуни вахтна, гъулариан гъюрайи жигьиларихъди жаради саб десте ачмиш дапIна.
Гизаф йисари жигьил наслиз аьгъювалар ва тербия тувбаз лигну, Къирхлер Мягьямедов райондин образованиейин управлениейин, Табасаран райондин администрацияйин терефнаан саб-швнуб гьюрматнан грамотайихъди лишанлу дапIна. Гьацира Къирхлер Шерифовичдиз 2016-пи йисан «РД-йин уьмуми образованиейин лайикьлу работник» ччвурра тувна. Гизаф йисари гъизигу лайикьлу зегьметназ ва жигьил наслиз аьгъювалар, тербия тувбан ляхниъ гъазанмиш гъапIу хъуркьувалариз лигну, 2018-пи йисан РД-йин образованиейинна илимдин министерствойин гьюрматнан грамотайихъди лишанлу дапIна. Гьацира 2018-пи йисан Къирхлер Мягьямедовдиз ДИРО-йин ректори гьюрматнан кагъаз хътапIну. Му кас гьацира 2011-пи ва 2014-пи йисарин математикайиан «Йисандин мялим» кIуру конкурсдин гъалибчи ву. Мугъан мялимвалин тажруба вари 33-йис ву.
«Вари деврариъ мялимди жигьил наслиз аьгъювалар, аькьюл, уьмриъ дюз рякъ абгбаъ кюмек туври гъахьну. Хъа баяр-шубаринра юкIвариъ мялимди туву дарсар, насигьят, чпихьна вуйи янашмиш’вал гьаргандиз гъузру. Гьаци, йизра узуз дарсар туву мялимарикан ужудар фикрар, хиялар гъузнайиз. Мялимвалин пише ктабгъуз дурари тясир гъапIунзуз. Дурарикан гизаф рази вуза ва йиз мялимариз лап кIваантIан чухсагъул пуз ккундузуз.
Улихьган мектебдиъ, жара урхбан тешкилатариъ жигьилари чпин кIул’инди урхуйи. Дурарин аьгъювалар гъадагъбахъ, зегьмет зигбахъ юкIв хъайи. Хъа гьамус жара замана дуфна. Йиз фикриан, Совет гьюкуматдин девриъ образованиейин къурулуш фукьан вушра ужуб, дюзди ккабалгнайиб вуйи. Дици вуйивал гьадму вахтари цирклиъ ихь уьлкейиъ, гьадму гьисабнаан Дагъустандиъра, культурайиъ, илмин, промышленностдиъ, гьясилвалиъ гъазанмиш гъапIу хъуркьувалари тасдикь апIура.
Гьамус рябкъюрахьуз, аьхю пай жигьилар урхбахьна, аьгъювалар гъадагъбахьна вижнасузди янашмиш шула. Дурариз вари рягьятди кIулиз адабгъуз ккунду. Баяр-шубари художественный китаб хилизкьан гъадабгъури, урхури имдар. Гъи ихь уьлкейиъ ригъ алабхъру терефнан уьлкйирин образованиейин гъурулушдин тереф уьбхюра. ЕГЭ жюрейин имтигьнари гизаф нукьсанар, камивалар арайиз хура. Натижайиъ ихь жигьиларикан аьгъювалар адру, чпин пишйириз лайикь дару инсанар арайиз гъюра. Гьаддиз гьамусдин деврин жигьиларин фикрар, тIалабар дигиш духьна. Дурар дюз рякъ’ин алаъну, гьелбетда, тербияйин ляхинра жанлу апIну ккунду», – гъапнийи ич сюгьбатнаъ Къирхлер Мягьямедовди.