17-пи августдиъ «Мягьячгъала» аэропортдиъ вари халкьарин цIийи терминал ачмиш гъапIну. ЦIийи терминал пас-портар ахтармиш апIру 10 кабинайихъди ва таможняйин ахтармишар гъахру йишвахъди тямин дапIна. Аэропорт яркьу апIбаз лигну, саб сяаьтнан арайиъ ахтармиш дапIну деетурайи пассажирарин кьадар 60-рилан 190-риина за апIуз мумкинвал тувди. Думу ляхни республикайиз самолетариъди пассажирар гъювалин ва гъягъювалин ляхник гьяракат кипди.

 

Аэропортдиъ кIули гъуху расвалин ляхнари деврин тIалабариз гъилигу завун гимйир кьабул апIуз артухъси мумкинвалар ачмиш гъапIну. Мидланра савайи, тIирхурайи самолетарин хатIасузвал, маршрутарин циркил яркьу гъапIну, гьииди Мягьячгъалайин аэропортдин самолетар дурсру майдандиина гьавайиъди пассажирар ва гъагъар гъахру цIийи тешкилатар жалб апIиди.

1927-пи йисан ачмиш гъапIу «гьавайин станция» либхури саки 100 йис шула. Думу вахтна Дагъустандин агьалйирин игьтияжар гьуркIбан бадали, 5 Р-2 самолетар лихури гъахьну. Гъи Мягьячгъалайин аэропортди маршрутарин циркил яркьу апIура, Кафари Кавказдин федералин округдиъси, вари уьлкейиъра гьавайин гимйириъди пассажирар гъахбаан ужудар натижйир улупура.

Туристарин Дагъустан-дихьна вуйи маракьлувал за хьували чпин маршрутар яркьу апIбиин машгъул вуйи авиакомпанйирин ихь республикайихьна вуйи янашмиш’вал дигиш апIуз гъитра. 2021-пи йисан январилан июлин аьхиризкьан Мягьячгъалайин аэропортдиъ самолетарин 8806 рейсар кьабул дапIна. Думу улупуб 2020-пи йисандин улупбарихь тевиган, 54,4%-дин артухъди ву.
Ургуб вазлин арайиъ мина-тина гъуху гъагъарин кьадарра 2578,23 тоннайиина удубчIвну. Думу улупуб кризис улубкьайиз вуйи 2019-пи йисандин улупбарихь тевиган, 25,6%-дин артухъди ву.

Дупну ккундуки, багарихьди «Мягьячгъала» аэропортдин самолетар гъедергру ва кьабул апIру зул дибдан рас апIуз кка. Му ляхнар кIулиз адагъиган, аэропортдихьан гъагъи жюрейин гимйирра кьабул апIуз хьибди. РФ-дин транспортдин министерствойи рас апIбан саб-швнуб вариантариз лигура.