Улихьна йигъари Дагъустан Республикайин правительствойин председателин заместитель Манвел Мажонцди агьалйир газдихъди тямин апIбан проект уьмриз кечирмиш апIбаз бахш дапIнайи, манзилнаъди вуйи видеоконференция кIули гъубхну.
Думу конференцияйиъ Дагъус-тандин газ дизигнайи гъулар-йишвариъ дидихъди тямин дапIну адру хуларин гьякьнаан сюгьбат гъубхнийи.
Жямяаьтлугъ газдихъди тямин апIувал – му Урусатдин Федерацияйин Президент Владимир Путиндин табшуругъниинди уьмриз кечирмиш апIурайи цIийи проект ву. Проектдиз асас вуди, газ дизигнайи гъулар-йишвариъ хуларихънакьан газ пулсузди дизигну ккунду.
Региондин тялукь министерствйирин ва «Газпром» ПАО-йин гъурулушдиъ айи регионарин подразделенйирин вакилари, газдихъди тямин апIбан ляхин жанлу апIбан бадали, гъабхурайи ляхнин натижйирикан ва алахьурайи читинваларикан ктибтнийи.
Совещаниейиъ газдихъди тямин апIру саб вуйи операторихьан газдихъди тямин дапIну адру хуларин мяишатарин гьякьнаан гьяракатниинди мялуматар тувуб ва дурар сентябрин 1-пи йигъаз вуйи графикдиъ тIаубра тIалаб гъапIнийи.
Хусуси хулар газдин турбйирик китIбан ляхнар гьамци кIули гъахиди: республикайин муниципалин образованйирин администрацйири, хусуси метлеб айи сиягь гьязур апIбан бадали, ватандашарихьан аьрзйир кьабул апIиди.
Конференцияйиъ РД-йин минэнергойин, РД-йин финансарин министерствойин, РД-йин хусусиятнан министерствойин, «Мягьячгъалайин газпром межрегионгаз»» ООО-йин, «Мягьячгъалайин газ пай апIру Газпром» ОАО-йин, «Дагъустандин газ пай апIру Газпром» ООО-йин ва гьамцдар жара идарйирин вакилар иштирак гъахьнийи. Сюгьбатарин натижйириз дилигну, газдин турбйирик китIувалин конкурсдин яркьу кампания тешкил апIуз ва агьалйир гъаврикк ккаъбан ляхин гужал апIуз йикьрар гъапIну.
