Цци Табасаран райондиъ бегьер уч апIбан кампания фици кIули гъябгъюраш аьгъю апIбан бадали, улихьна йигъари райондин гъулан мяишатдин ва инвестицйирин управлениейин директор Ширинбег Мурадялиевдихъди гюрюшмиш гъахьнийза.
Ич сюгьбатнаъ дугъу къайд гъапIганси, бегьер уч апIувалин компания гьаму йисанра харжиди кIули гъябгъюрадар. Гьаму йисан, мисалназ, августдин 13-диз вуйи улупбаринди, Табасаран райондиъ экинчйири 1074 гектар хутIлариан 2348,5 тоннайин тахил уч гъапIну (гьарсаб гектариан бегьерлувал 25 центнер). Гьадму гьисабнаан 925 гектариан 2312, 5 тонна дяхин (бегьерлувал 25 центнер), 20 гектариан 36 тонна нюрх (18 центнер) уч гъапIну. 115 гектариъ гьяжибугъдара дубзна. Гъулан мяишатдин му мягьсулин бегьер гьеле уч апIуз хъюгънадар.
«Ихь багълариан йимишаринра ужуб бегьер уч апIура. Гъийин йигъаз ухьуз айи 1032 гектар багъларикан 345 гектариан 2221 тонна (бегьерлувал 64,4 центнер) йимишар уч дапIна. Гьадму гьисабнаан 56 гектариан 392 тонна алчйир (70 центнер), 22 гектариан 229 тонна беълийир (104 центнер), 137 гектариан 850 тонна жвугърийир (62 центнер), 30 гектариан 150 тонна худар (50 центнер), 100 гектариан 600 тонна вичар-жихрар (60 центнер).
Табасаран райондиъ гьар йисан бистнин мейвйирра гьясил апIуру. Гьаму йисан мейвйир 701 гектариъ дурзна, гьамусдиз 370 гектариан дурарин 2590 тонна (70 центнер) уч дапIна. 20 гектариан 160 тонна нимкъар (80 центнер), къуру алафар – 56000 тонна, 945 гектарилан 1750 тонна лембе уч гъапIну. Картфар дурзнайи 557 гектар хутIларикан 420 гектариан 4200 тонна (бегьерлувал 100 центнер) картфар, бахчайин культурйир кивнайи 10 гектарикан 7 гектариан 80,5 тонна (бегьерлувал – 115 центнер) уч гъапIну. 1168 гектариъ кивнайи тIумтIарин бегьер гьеле уч апIуз хъюгънадар. ТIумтIар уч апIувалин улихьна вуйи гьязурлугарвалин ляхнар лап гъизгъинди кIули гъягъюра. ТIумтIар уч апIбан кампания ккебгъайиз, дурар уч апIуз лазим вуйи кьадар рабочйирин, техникайин, транспортдин, ургру» ктатру материаларин гъайгъушнаъ духьну ккунду. Гьаци дархьиш, жикъи вахтнан арайиъ тIумтIар уч дапIну ккудукIуз шулдар. Пишекрарин улупбариинди, гьаму йисанра тIумтIарин ужуб бегьер гъадабгъуз хьибди. ТIумутIчйири къайд апIурайиганси, гьяйифки, битмиш гъабхьи тIумтIарин бегьер иша апIуз гизаф читинвалар алахьура. Табасаран райондиъ тIумтIар лазим вуйи къайдайиинди кьюрдуз уьрхюз шлу шартIарихъди албагнайи йишв адар. Хъа ухьуз аьгъюганси, тIумутI ухди чIур шлуб ву. ТIумтIар уч апIру вахтна, увуз ккундушра, дурар багьа кьиматназ масу тувуз шулдар. Чяхир гьясил апIру заводари тIумтIар лап ужуз кьиматназ масу гъадагъуру. Думу месэла чарасуз гьял дапIну ккуни месэлйирикан саб вуди гъубзра», – гъапнийи Ширинбег Мурадялиевди.
Йиз фикриан, Табасаран райондиъ гъулан мяишатдин итIру сурсатар уч апIбаан гъийин йигъаз вуйи натижйир харжидар дар. Зегьмет гъизигиш, ухьухь ужуб бегьер битмиш апIуз шулу. Хъа ихь гьясилдрариз гьам гьюкуматдин, гьамсана дилаварчи касарин терефнаан цIибди вушра, пулин дакьатарин кюмек гъабхьнийиш, хъана ужу шуйи.
