18-пи августдиъ Табасаран райондин администрацияйиъ сесер тувбан саб вуйи йигъан жюрбежюр дережайин сечкйир гъахбаз гьязурлугар гъахувализ бахш дапIнайи совещание кIули гъубшну.

 

Думу саовещаниейиъ райондиз дуфнайи Дагъустан Республикайин юстицияйин министр Къазимягьямед Сефикъурбанов, Табасаран райондин глава Мягьямед Къурбанов, райондин администрацияйин жавабдар гъуллугъариъ айи касар иштирак гъахьну.

Мягьямед Къурбановди къайд гъапIганси, 17-пи, 18-пи, 19-пи сентябриъ райондин гъулариъ сечкйирин 66 участок (УИК) ачмиш апIиди. Сечкйирин йигъари ватандашарихьан Урусатдин Федерацияйин Государствойин Думайиз ва Дагъустан Республикайин Халкьдин Собраниейиз – депутатарди улупнайи кандидатарихъан чпин сесер тувуз хьибди. Табасаран райондиъ вари 36 агъзур сечкичи гьисабназ гъадагъна.

Къазимягьямед Сефикъурбановди сечкйирин кампанияйиз техника жигьатнаан гьязур хьувалин УИК-диз жара дапIнайи йишварин, РФ-дин ЦИК-дин тIалабар тамам апIувалин, аьлава вуди электроэнергияйихъди тямин апIру алатарихъди, сесер тувувал улупру видеокамерйирихъди тяминвалин суалар гъитIирккнийи.

Сечкйир гъахувалин ляхниъ коронавирусдин инфекцияйи чан дигиш’валар тIаъну. Гьаддиз, сесер тувбан саб вуйи йигъ 19-пи сентябрь вушра, инсанар сабишв’индии уч дархьбан бадали, сечкйирин участкйирин раккнар 17-пи сентябриъ ачмиш апIиди. Гьаддиз сечкйирин гьарсаб участокдиъ сесер тувбан ляхин ккудубкIайизкьан бюллетенар уьрхру сейфар ади хьувал чарасуз лазим ву.

«Табасаран райондиъ сесер тувбан ляхин заан дережайиъди гъябгъбан бадали, вари мумкинвалар ишлетмиш апIувал лазим ву», – къайд гъапIну Мягьямед Къурбановди.