Улихьдин вахтариси дарди, гьамусдин девриъ инсанар гьарган наана-вуш гьялакди, кIвак гъалабулугъвал кадитIан рякъюри шулдар. Узуз лап багахьди таниш вуйи табасаран миллетдин дишагьлийирин арайиъра машнаъ ригъдин нур атIабгнайи дишагьлийир цIибдитIан рякъюри имдар.
Улихьна йигъари редакцияйиз Орловский областдиъ яшамиш шулайи, «Табасарандин нурар» газатдин дустарикан сар вуйи Мюгьюбет Шагьсинова хялиш гъахьнийи. Редакция хялар кьабул апIуз гьарган шад ву, хъа думу жюрейин хялар лап тек-тюкра алахьури шулдар.
Думу дишагьлийи сар узу ваъ, вари ич редакцияйин коллектив гьяйран гъапIну. Мюгьюбет зигьимлу, деврин уьмрин месэлйирин гъавриъ айи, гьаддихъди сабси, ужуб, албагу хизандин кIулиъ айи, табиаьтдин марцци кьувват, гьевес ачухъди рябкъюрайи дишагьли ву. Дугъан гафари ва ляхнари яв фагьум чаз табигъ апIуру, чан кIван манишин пай апIури, багахь хьайидариз шадвал тувру.
Кьюд йис мидиз улихьна ич теклифниинди Мюгьюбет ва дугъан жилир Багьудин редакцияйиз гъафнийи. Гьаддихъан мина дурар инстаграмдиъ газатдин страничкайиъ айи вари мялуматарихъди таниш шула.
Шагьсиноварин хизандиз багарихьди газатдин юбилей шулайиваликанра мялум вуйи. Гьаддиз Мюгьюбет багъри редакцияйиз пешкеш хьади ва редакцияйиъ убхурайи халачийик чан гугар китIуз ният ади дуфнайи. Мюгьюбетди чан пешкеш адабгъиган, вари мюгьтал гъахьунчу. Урусатдин Орловский областдиъ гизаф йисари яшамиш шулайи табасаран дишагьлийи, чан хилариинди дубхну, «Табасарандин нурар» ччвур, газатдин сайтдин электрондин адресра кмиди дибикIнайи халачи пешкеш вуди дубхнайи. Дугъу халачи адабгъиган, учу «Поле чудес» передачайиъ иштирак шулайиганси гъабхьунчуз. Мидланра савайи, Мюгьюбетди ихь газатдиз бахш дапIнайи, чав ктабгъу шиир аьхю аьшкьниинди учуз гъурхнийи.
Мюгьюбет Шагьсинова гьар йисан хьадан вахтна багъри ватандиз багахьлуйириин улукьуз гъюри шулу. Гьаму ражарира мектебариъ дарсар ккергъайиз, рюгьнан кьувват артухъ апIбан бадали, думу Дагъустандиз дуфнайи.
«Узу мектебдиъ бицIида-рихъди ляхин апIураза. БицIидариз ккуни мялим хьпан бадали, гизаф зегьмет дизигну ккунду. Мялим гъюри гъяркъиган, бицIири раккин ачмиш апIураш, думу мялимдиз айи гьюрматнан сабпи лишан ву. Узу гьацира «Урусатдин халкьарин рюгьнан ва намуслувалин культурайин бина» ччвур тувнайи дарсарра кивраза, халачи убхувалиан кружокра гъабхураза. Аьхюну классариъ урхурайи баяр-шубарихъди читинвалар гизаф алахьурайивализ дилигну, план тартиб дапIну, «Гележегдиз рякъ» ччвур тувнайи дарсарра кивраза. Намуслувалиинди зегьмет зигувализ ва образованиейин цирклиъ хъуркьувалар гъадагъбаз лигну, 2020-пи йисан Урусатдин мярифатнан министрин къул али Гьюрматнан грамотара тувунзуз», – гъапнийи Мюгьюбет Шагьсиновайи ич сюгьбатнаъ. Дугъу хизандин «ЛАД» клубдиъра ляхин гъабхура. Клубдиъ жигьил ва гьацира арайиъ наразивалар гъахьи хизанариз албагуз кюмек апIура.
Мюгьюбет Багьудиновна, уву гъабхурайи баркаллу ляхниз чухсагъул, гъит ихь арайиъ увусдар яшайишдин гьевес кайи инсанар артухъ ишри, яв кабхьну убгурайи кIван манишну уьмрикан юкIв кадабтIнайи инсанаризра мани апIри.
***
«Табасарандин нурар» газатдиз бахш апIураза йиз шиир
Ккунирин кагъзиз ккилигруси,
Шадди вуча ув’ин гьарган.
Яв гюзел ччвурси кIваз хушди
Вува, ич «Табасарандин нурар».
Гюрчег хярарин кюкйирси,
Рябкъюру гьарсаб уччвуб маш.
Абйирин мисал вуйиси,
Кьимат – «саб малин гьарсаб гаф».
Дагъустандин хъуркьувалар,
Райондин ужудар хабрар.
Гьарсаб жюре тербияйин,
Шулив сюгьбат яв машарин.
Чухсагъул ичв идарайиз,
Яв гъуллугъчи пишекрариз,
Уьмрин фунуб аьгьвалатназ,
Вува насигьят инсандиз!
Му дюн’яйиъ кьадарсузди
Читин чIалнан дафтар вува.
Туври адмйириз мясляаьт,
Шулва ич багьалу газат!
Гъит яв рякъюъ гьар вахтна,
Мани ригъдин аквар ишри.
Увуз бахт хьуб метлеб вуйиз
Ич «дамагъ» — «Табасарандин нурар»!
Халгъарин кьялан мектебдин 1981-пи йисандин выпускник риш Мюгьюбет Багьаудиновна Шагьси-нова (Аьлибегова), педагогикайин ва психологияйин мялим, Орёл шагьур.
