Гьарсар касди ихтиятвал гъапIиш, Аллагьра кюмек шул. Гъи ихь уьмриъ гьич саринра кIваин алдру коронавирусдин уьзур убчIвбахъди сабси инсанарин яшайишдин къайдара гизаф дигиш гъабхьну. Фунуб уьзур гъабхьишра, дидихъди зарафтар дапIну ккундар.

 

 

Ухьу ихтиятвал дарапIувал асас себеб вуди, гъи му уьзриан хайлин инсанар кетIерццна. Ав, варидариз шадлугънан мяракйир ккундухьуз, кечмиш гъахьирин теклифназра гъягъруб ву. Амма уьзрикан сар касдира я фикир, я дидхьан ихтиятвал апIурадар. Гьаддиз ухьу, уьзрин йисирар духьну, думу аьх апIурахьа.
Улихьна йигъари ич арайиъ гъабхьи сюгьбатнаъ Дербент шагьрин кьялан больницайин эпидемиологияйин отделениейин заведующий Рустам Рамазановди (шиклиъ) шагьриъ коронавирусдиан иццурайидарин кьадар ва дурарин гьял фициб вуш ктибтнийи.

– Рустам Низамудинович, Дербентдиъ коронавирусдин уьзриан кетIерццнайидарин кьадар фукьан дубхьна?

– Аьзарлуйирин кьадар йигълан-йигъаз артухъ шула, ва шагьриъ 4 агъзуртIан артухъ инсанар коронавирусдин уьзриан иццура. Мициб мусибат арайиз гъювалин тахсиркрар ухьу вухьа. Гьаз гъапиш, ухьуз аьлимари ва духтрари кIурайи гафар фикриз гъадагъурадархьа, маскйир алахьури, кми-кмиди хилар спиртдихьди жикIури, гизаф инсанар шлу йишварихь арайиъ манзил уьбхюри, чарасузвал адарди хул’ан удудучIври гъузну ккунду.
Больницайикан улхуруш, стационариъ сагъ апIурайи 124 кас айич, дурарикан 23 кас лап читинди вуйидар, хъа 2 кас гьял алдарди кислороддин аппаратарикк ккайич.

– Гъийин йигъаз Дербент шагьрин фукьан агьалйири вакцинайин рубар йивна?

– Гъийин йигъаз шагьрин 12 агъзур агьалийи вакцинайин рубар йивна. Гьамусяаьт Дербент шагьриъ вакцинайин рубар йивру 4 пункт арццна. Урусатдиъ му уьзриз аьксиди юкьуб жюрейин вакцинйирра адагъна, Дербент шагьриъ яшамиш шулайи агьалйириз Гам-КОВИД-Вак (Спутник-V) ва Спутник Лайт вакцинйирин рубар йивура.

– Вакцинайин рубар гъиву саспи инсанар йихура кIури, хабрар а. Дурар дюздар вуйин?

– Дурар кучIлин хабрар ву. Вакцинайин руб гъиву кас гъакIну кIури, учухьна гъийин йигъаз аьрзназ гъафидар адар. Думу ляхин гьамцира хьуз мумкин ву. Вакцинайин руб гъиву кас 3-4 йигъан хул’ан удудучIвди гъузну ккунду. Дугъан иммунитет прививка йивбан кьяляхъ гьеле зяифди шулу, ва дугъаз вирус кайи кас алахъуб мумкин ву. Гьаддиз ихтиятвал дапIну ккунду. Бедендин температура за гъабхьибси, анализар тувуз гьяракат дапIну ккунду ва духтрихьна илтIикIну ккунду. Иццурайи инсан вахтниинди духтрихьна илтIитIикIиш, кьан гъабхьи вахтна учхьанра фукIара апIуз шулдар. Хъана кIураза, вакцинайин руб йивайиз, терапевт духтрихьан насигьят гъадабгъну, руб йивуз хай шулуш-шулдарш аьгъю дапIну ккунду.
Саб жикъи манзилнаъ сабур дапIну, духтрари кIурайи гафариз фикир тувну, инсанар хулаъ дусуб лазим ву. Гизаф инсанар уч шлу йишвариз душну ккундар. Гъи гизаф инсанар саламдиз вая сумчриз гъягъюра, хъа закур – больницайиз.

Полицияйин гъуллугъчйири му ляхниз фикир туври адруваликан пуз шулу. Гьаз гъапиш, сумчрар апIру дараматар хъяркьиган, хайрар-шейрарин эйсйири, хъана гизаф инсанар уч дапIну, мяракйир чпин хуларин гьяятариъ гъахура, ва натижайиъ гьар йигъан инсанар му уьзриан гъирмиш шула. Гъи му ляхнихъан жавабдарвал гъабхру гъуллугъчйириз суал тувну ккунду, гьаз инсанарихьна дурарин мициб гъайгъусузвал аш…
Гъи тялукь гьякимарикан му суалназ жаваб тувуз шлур, йиз фикриан, гьич фужкIа адар, гьаз гъапиш инсанар артухъди уч духьнайи мяракйирин иштиракчйирра дурар чпи ву.