Улихьна йигъари Хив райондиъ генерал-майор Эседуллагь Аьбдулмуминович Абачев къаршуламиш апIбан мярака кIули гъубшну.
КIваина хурхьа: Хив райондин Зилдик гъулан агьали Эседуллагь Абачевдиз гъябгъюрайи йисан 21-пи мартдиъ Урусатдин Президент Владимир Путиндин тялукь Указдин бинайиинди Урусатдин Яракьлу Кьувватарин генерал-майор заан ччвур тувну.
1989-пи йисан Харьков шагьрин танкарин командйирин заан училище ккудубкIну, Эседуллагь Абачевди Ватандиз гъуллугъ апIуз хъюгъру. 2002-пи йисан дугъу Урусатдин Яракьлу Кьувватарин уьмуми кьушмарин академияра ккудубкIну. Яракьлу Кьувватарин дахилнаъди дугъу жюрбежюр жавабдар гъуллугъариъ Ватандин азадвал ва сабвал уьбхбан рякъюъ баркаллу зегьмет гъизигну. Гьаци, Эседуллагь Абачевди Кафари Кавказдиъ, Кьибла Осетияйиъ, Азербайжандинна Арменияйин арайиъ кIули гъушу дявдин гьяракатариъ заан намуслувал улупну. Гьамусяаьт ихь ватанагьлийи Уссурийск шагьриъ ерлешмиш духьнайи дявдин кьувватарин дахилнаъди Ватандиз гъуллугъ апIура. Думу хайлин медаларинна орденарин сагьиб ву.
Багъри райондиъ генерал-майор заан дережайиъди ва гьюрматлувалиинди къаршуламиш апIбаз бахш вуйи шадлугъариъ республикайин гьюкмин саб жерге вакилар, Урусатдин азадвал уьбхбан гъуллугънаъ айи генерал-майор Арсен Рягьманов ва генерал-лейтенант Рустам Мурадовра иштирак гъахьну.
Багъри райондиъ генерал-майор Эседуллагь Абачевдин гьюрматназ уч духьнайи хялар сифте нубатнаъди Ватан бадали фашистарихъди вуйи дявдин женгариъ чпин жанар фида гъапIу ватанагьлийириз Хив Гъалибвалин паркдиъ дивнайи «Лизи кьарнийир» ядигарихьна уч гъахьну.
Райондин культурайин Хулаъ асас шадлугъар ачмиш апIури, Хив райондин глава Ярмет Ярметовди Эседуллагь Абачев му заан ччвурнахъди райондин вари жямяаьтлугъдин терефнаан тебрик гъапIну.
Мяракайиин генерал-майор тебрик апIури, РД-йин Минюстдин кIулиъ айи Къазимягьмед Сефикъурбанов, РД-йин НС-йин депутат Алавудин Мирзабалаев, СтIал-Сулейман райондин глава Нариман АьбдулмутIалибов ва гь.ж. удучIвну гъулхну.
Чан гьюрматназ тялукь шадлугънан мярака тешкил апIбаз чухсагъул мялум дапIну, Эседулла Абачевди саб бицIи дагълу гъулаъ аьхю ва тербияламиш гъахьи аьдати бай вуйи учв генерал-майорин дережайихъна гъювалин рякъюн сирнакан гъулхнийи.
– Фунуб ляхниъра хъуркьувалихьна рукьбан бадали, гьарсар касдиз, чан улихь кьатI’и месэлйир дивну, уьмрихьна вуйи хусуси лигуб ади хьувал чарасуз лазим ву. Хасиятнан ижмивал узуз йиз рягьматлу адашди ва узуз мектебдиъ илим ва тербия туву мялимари тувну. Гьяйифки, узу генерал-майорин дережайихьна рукьайиз, адаш рягьматдиз гъушну: дугъу учуз (узуз ва йиз гъардшариз) фициб дюшюшдиъра ватанпервервал, рюгьнан кьувват уьбхюз улупну. Хъа адашди туву дарсар уьмриъ алахьу дюшюшарин читинвалари имбубсан лигим гъапIну.
Гьелбетда, дявдин гъуллугъ рягьтиб шули аьдат дар. Хъа зегьметну жвуван Ватандиз, жвуван багъри касариз азадвал, гележегдиз ислягьвал туврувалин гъавриъ айивали вари читинвалар аьх апIуз кьувват тувру. Читинвалар намуслувалиинди кьабул гъапIиган, гъалибвалихънара гъюру.
Гъи артмиш шулайи наслар ватанпервервалин гьиссариккди тербияламиш апIбан месэлйириз заан фикир ва эгьемият тувра. Дюзра ву.
Узу мектеб ккудубкIурайи йисари дагълу гъулариан дявдин гъуллугънан урхбан идарйириз гъягърудар лап цIибди вуйиш, гъи ихь хайлин жигьилари Урусатдин Яракьлу Кьувватарин жергйириъ баркаллувалиинди гъуллугъ апIура. Тялукь жигьилари Урусатдихъ кьувватлу ва ислягь гележег хъайивалра субут апIура. Гъит ихь ватанпервер насларин жергйир хъанара яркьу ишри! Ухьу гьар вахтна, жвуван Ватан, жвуван халкь бадали, женгназ гьязурра вухьа. Гъит Урусатдиъ, уьлкейиъ гьар вахтна укIу завари ва бицIидарин аьлхъбан сесери агъавал апIри!», – гъапну Эседуллагь Абачевди.
