Урусатдин Федерацияйин Президент Владимир Путин Владивостокдиан видеойин аьлакьайин кюмекниинди Дагъустандиъ Урусатдин оборонайин министерствойи тикмиш гъапIу яшайишдин объектар ачмиш апIбан серенжемдиъ иштирак гъахьну.
«Аьдат вуйиганси, 1-пи сентяб-риъ ихь уьлкейиъ урхбан цIийи йис ккебгъувалихъди аьлакьалу серенжемар кIули гъягъюру. Дагъустандиъ яшайишдин 37 дарамат ляхин апIуз ачмиш апIувал – гьацдар шадлу гьядисйирикан ву. Думу кьадарнакан 36 дарамат военный тикилишчйири тикмиш гъапIдар ву», – гъапну Владимир Путинди.
Дугъу къайд гъапIганси, мектебар, бицIидарин багъар, яслйир деврин тIалабариз жаваб тувру техникайихъди, авадлугъарихъди, бицIидари рягьятвал гъадабгъру, тамшир апIру спортдин майднарихъди тямин дапIна.
Президентди туву мялуматариинди, республикайиъ йисан аьхириз хъана гьадму кьадар дараматар тикмиш апIиди.
«Узуз ккуни Дагъустандиъ оборонайин министерствойи яша-йишдин 37-сан дарамат тикмиш апIура, думу кьадарнакан 27, гьаму йисандин аьхириз ккудукIну, ачмиш апIиди. Образованиейин цIийи идарйири Дагъустандин яшайишдин артмиш’валик гьяракат кипди, бицIидариз тербия ва аьгъювалар тувуз гъулай шартIар арайиз хиди», – мялум гъапIну уьлкейин кIулиъ айири.
Чан удучIвну улхбаъ Урусатдин оборонайин министр Сергей Шойгуйи тасдикь гъапIганси, тикмиш дапIнайи дараматар – урхрудариз 700 йишв айи кьюб мектеб, 1210 бицIириз йишв айи 7 багъ, 5160 бицIириз йишв айи 27 ясли ву. Дугъу гьацира Дагъустандин кIулиъ айири дявдинна тикилишчивалин комплексди региондиъ апIурайи ляхниз заан кьимат туврайиваликан ва думу ляхниз кюмек апIурайиваликан гъапнийи.
Вахтназ вуди Дагъустандин Главайин вазифйир тамам апIурайи Сергей Меликовди вари дагъустанлуйирин терефнаан, региондиъ мектебдин образованиейин ери за апIбан бадали, кьабул апIурайи уьлчм-йириз чухсагъул мялум гъапIнийи. Дугъу къайд гъапIганси, республикайиъ военный пишекрари тикмиш апIурайи дараматарихъди сабси, йисандин аьхириз цIийи 51 дарамат, мектебар ва бицIидарин багъар ачмиш дапIну ккунду. «Владимир Владимирович, гъи республикайин 19 шагьрар-гъулариъ образованиейин 20 дарамат ачмиш дапIна. Гьамусяаьт узу айи Эндирей гъулан агьалйири чпин гъулаъ мектеб диву дявдинна тикилишчивалин комплексдин пишекрариз аьхю чухсагъул мялум апIура», – гъапну Сергей Меликовди.
Эндирей гъулаъ мектеб тикмиш апIури, сад йистIан цIиб артухъ вахт гъабхьнийи. Гъулан 300 урхрудар кьабул апIуз гьязур вуйи цIийи дарамат (шиклиъ) деврин тIалабариз жаваб тувруб ву.
Гьаму йигъан уьлкейин Владимир Путиндин ва Сергей Меликовдин видеойин аьлакьайин къайдайиинди вуйи иштирак’валиинди Мягьячгъалайиъ «Ак-Гель» микрорайондиъ, Къизилюрт райондин Кульзеб, Казбековский райондин Ленинаул ва Дербент райондин Аьраблинское гъулариъ мектебдиз улихьна вуйи бицIидарин багъар ачмиш гъапIну.
