Гьаму улихьна йигъари Табасаран райондин ЧIвурдаф гъулаъ бицIидарин багъ ачмиш апIбахъди аьлакьалу шадлугънан серенжем кIули гъубшну. Серенжемдиъ Табасаран райондин глава Мягьямед Къурбанов, РД-йин юстицияйин министр Къазимягьямед Сефикъурбанов, РД-йин НС-дин депутат Алавудин Мирзабалаев, Табасаран райондин депутатарин Собраниейин председатель Иса Исаев, Табасаран райондин РОВД-йин начальник Насир Ягъибегов, Табасаран райондин образованиейин управлениейин кIулиъ айи Аьбдусалам Гьясанов, гьацира жара хялар ва ЧIвурдаф гъулан жямяаьт иштирак гъахьну.
Шадлугънан серенжемдиъ удучIвну гъулху юстицияйин министр Къазимягьямед Сефикъурбановди бицIидарин багъдин вари коллектив му важиблу гьядисайихъди тебрик, ляхниъ хъуркьувалар ккун гъапIнийи.
«Гьарсар касди чахьан шлу ляхин тамам апIруган, гьамциб уьмарат арайиз гъюру. Гъит му бицIидарин багъ ичв жямяаьтди анжагъ ужувлаз, шадвализ, хайирназ ишлетмиш апIри», – къайд гъапIну дугъу.
Алавудин Мирзабалаевди чан удучIвну улхбаъ гъи гьамкьан утканди дабалгнайи бицIидарин шаду машар рякъювал машквар вуйиваликан гъапнийи. Дугъу гьацира гъулан жямяаьтдикан, 19-пи сентябриъ шулайи сечкйириъ иштирак духьну, гьякьлу рякъ ктабгъувал ккун гъапIнийи.
БицIидарин багъ тикмиш апIбаъ зегьмет гъизигу касар Мягьямед Къурбановди гьюрматнан грамотйир тувбиинди лишанлу гъапIнийи ва дурариз аьхю чухсагъул гъапнийи.
ЧIвурдаф гъулан «ПсинчI» кIуру бицIидарин багъдин заведующий Чермен Мягьямедовди чан удучIвну улхбаъ гьамцдар гафар гъапнийи: «Гьаму вахтнан хайир ибшри, гьюрматлу хялар, дустар ва гъуландар. Гъи учву ич ЧIвурдаф гъулан утканди албагнайи бицIидарин багъдиъ кьабул апIуз рази вуча. Гъи аьхю шадвалин йигъ вуйихь. Гъи мушваъ 25 бицIирикан ибарат вуйи саб десте тIапна.Узуз йиз ва вари ич коллективдин терефнаан, Мягьямед Къурбанов кIулиъ ади, Табасаран райондин улихь-кIулихь хьайидариз ЧIвурдаф бицIидарин багъ рас апIуз кюмек тувбаз, гьацира подряддин тешкилат «Юг Строй Сити» ООО-йиз, мушвахъ зегьмет гъизигу устйириз ва гъуландариз аьхю чухсагъул пуз ккундузуз. Узу вари гъуландар цIийи бицIидарин багъ ачмиш апIбахъди лап кIваантIан мубарак апIураза».
Серенжемдиъ цIийиди абццнайи бицIидарин багъдиъ айи бицIидари, шиърар дурхну, ялхъвнарра гъапIнийи. Гьацира Табасаран райондин культурайин хулан гъуллугъчйири концертра улупнийи.
Шадлугънан серенжемдиъ уьру лента гьадабтIуз Мягьямед Къурбановдиз, Къазимягьямед Сефикъурбановдиз, Алавудин Мирзабалаевдиз ва гъулан яшлу кас Керим Рашидов мялимдиз теклиф гъапIнийи.
Серенжемдин аьхириъ дуфнайи хялари, цIийи дараматдин айитI учIвну, дидлан илдицну, бицIидарихъди шиклар гъивнийи.
