Мялум вуйиганси, Урусатдин Федералин Собраниейин Гьюкуматдин Думайиз ва Дагъустандин Халкьдин Собраниейиз депутатар ктагъбан сечкйир кIули гъахайиз имбудар сакьюдар йигъартIан дар. Улупнайи сечкйир вари жямяаьтлугъдиз важиблу ву, фицики дурариъ гъалиб гъахьи касари улупнайи дережайиъди йишвариин али агьалйирин маракьар уьрхиди.
Вахтназ улихьна лазим вуйи вари серенжемар кьабул дапIну, Хив райондин ИК-дин кIулиъ айи Наилаханум Агъасиевайи (шиклиъ) субут апIурайиганси, дурар сечкйирихьна гьязур ву.
– Вари Урусатдиъси, Хив райондиъра 19-пи сентябриъ сечкйир кIули гъягъиди.
Улупнайи йигъан йишвариин сечкйирин ачухъ’вал тямин апIбаз, сечкичйир артухъди жалб апIбан ляхниз асас фикир тувбаз аьхю мяна а.
Пуз ккундузузки, сечкйир ужуб дережайиъди гъахбан бадали, гьарсар касди ватандаш тереф уьбхювал лазим ву.
Сечкйирихьна гьязурлугваликан гъапиш, Хив райондиъ натижалу ляхин дубхна. Гьаци, сечкйир тешкиллувалиинди кIули гъахбан жигьатнаан штаб ляхник ка. «Хивский район» МО-йин тялукь буйругъназ асас вуди, дидин иштиракчйир тяйин, ляхнин вазият ва асас серенжемар тартиб дапIна.
Райондиъ сечкйир кIули гъахбан бадали, 35 УИК-диъ ляхин гъабхиди. Дураририкан 20 мектебарин ужагъариъ, имбу 15 – культурайин ужагъариъ ерлешмиш духьна. Улупнайи УИК-ариъ 191 касди сечкичйирихъди лазим вуйи ляхин гъабхиди.
Сечкйир ужуб дережайиъди кIули гъахбан бадали, гьязурлуг’валин лазим вуйи вари серенжемар кьабул дапIнача: вари ужагъар материалинна техникайин алатарихъди тяминди ву. ХатIасузвал уьбхбан месэлйириз важиблу фикир тувра, – къайд апIура Н.Агъасиевайи.
Йиз сюгьбатчийин гафариан мялум шулайиганси, cечкйир гъахру ужагъар аьлава электрикдин акв тувру, аьлакьайин алатарихъди, компьютерихъди ва дидихъди табхьну гъюрайи принтерихъди тямин дапIна. Халкьдин маракьар республикайин ва федералин дережайиъди уьрхру депутатар ктагъбан сечкйириъ райондин УИК-арин вакилари гьарсар ватандашдихьна рукьруганси зегьмет зигиди. Сечкйирин комиссйирин дахилнаъ айи вари 191 кас чпин вазифйирихъди таниш ву. Сечкйирихьна гьязур шули, Хив райондиъ вари лазим вуйи серенжемар пландиз асас вуди тамам апIура.
