Сентябрин 4-пи йигъан вахтназ вуди Дагъустандин Главайин вазифйир тамам апIурайи Сергей Меликовдин регьберваликкди коронавирусдин инфекция тарабгъувализ аьксивал улупурайи Гьяракатнан штабдин нубатнан заседание кIули гъубшну.

 

Республикайин кIулиъ айири къайд гъапIганси, коронавирусдин тIягъвниз аьксивал улупбан месэла, вари уьлкейиъси, Дагъустандиъра сабпи йишв`ин гъубзра. «Уьзрихъди аьлакьалу аьгьвалат ужуб терефназди илтIибкIнашра, читинуб вуди гъубзра. Эгер аьхиримжи 10 йигъандин улупбар майдин вазлин улупбарихь тевиш, рябкъюрахьуз, гьар йигъан больницайиз 3,5 ражари артухъ аьзарлуйир гъюра (майдин вазлиъ гьар йигъан 77 кас, гьамус – 268 кас). Больницйириъ COVID-19 ва пневмония уьзрар кади саки 3,5 агъзур кас дахъна, гьадму кьадарнакан 200 кастIан артухъ гъагъи гьялнаъ айидар ву», – гъапну региондин кIулиъ айири.

– Ухьу пашман апIурайиб гьадму вуки, инсанар йихувал кам шуладар. Аьхиримжи 10 йигъан кьялан гьисабариинди сад йигъандин ва йишвандин арайиъ 14 кас, августдин вазлиъ кьялан гьисабариинди суткайиъ 15 кас, июлин вазлиъ – 6,5 кас, июндин вазлиъ – 2 кас йихури гъахьну. Думу улупбар уьлкейиъ айи аьгьвалатнахь тевиш, лап чIурудар дар, – давам гъапIну дугъу.

Сергей Меликовдин гафариинди, кьабул апIурайи уьлчмйирин мянфяаьтлувал рябкъюз шулу – уьзур кьяляхъ гъябгъюра.

Заседаниейиъ гьацира рес-публикайин больницйир кислороддихъди тямин апIбаан арайиз гъафи читинвалариканра гъулхнийи. Кислород Дагъустандиз Таганрогдиан, Краснодарин крайдиан ва Волгограддиан хура. Гъийин йигъаз республикайиз лазим вуйи 30 тонна кислороддин ерина 15 тонна кислородтIан хурадар. Совещаниейиъ му месэла гьял апIбан рякъяриканра гъулхну.

Заседаниейиъ къайд гъапIганси, кьанди вушра, гьамус инсанар вакцинайин рубар йивбан чарасузвалиин  умудлу духьна. Майдин вазлин улупбарихь тевиган, рубар йивурайидарин кьадар 4,5 ражари за гъабхьну.Сергей Меликовди Докъузпара ва Хив районариъ вакцинайин рубар йивувалин ляхин ужуди кIули гъябгъюрайивал къайд гъапIну.  Гъийин йигъаз вакцинайин рубар йивну ккунидарикан Докъузпара райондиъ 75% ва Хив райондиъ 64% агьалйири рубар гъивну.

– Гъи республикайиъ вакцинайин 167 агъзур дозайин дарман а. Думу вари муниципалитетариз гьубкIди. Урхбан цIийи йис ккебгъбахъди сабси аьзарлуйирин кьадар артухъ даршлуси ляхин дубхну ккунду.

Сечкйир гъахру сентябрин 17-19-пи йигъарра багахь шула. Сечкйирин участокар гизафси мектебариъ ерлешмиш духьна. Гьаддиз, инфекция тарабгъуз гъидритбан бадали, мектебариъ дарсар гъахбан график дигиш апIувал лазим хьибди, – гъапну республикайин кIулиъ айири.

РД-йин сагъламвал уьбхбан министр Татьяна Беляевайи чан терефнаан къайд гъапIганси, Дагъустандиъ коронавирусдин уьзриан аьзарлу духьнайидариз 4,8 агъзур йишв гьязурди а. Республикайин больницйириъ 3,1 агъзур кас дахъна. Аьхиримжи гьяфтайиъ больницйириъ 1,4 агъзур кас ккаъну, хъа 2,1 агъзур кас, сагъ дапIну, больницйириан деетну. Гьяфтайин арайиъ коронавирусдин уьзур кайи 95 кас гъийихну.

Татьяна Беляевайи сентябрин 1-пи йигълан мина вари агьалйирин  арайиъ, хъа коронавирус уьзур кубчIвну сагъ гъахьи инсанарин арайиъ дериндиан диспансеризация гъабхурайиваликан гъапнийи. Думу важиблу месэла фикир тутрувди гъибтну ккундар.

Гьадму месэлайин гьякьнаан Сергей Меликовди РД-йин сагъламвал уьбхбан министерствойиз ва муниципалин образованийирин главйириз агьалйирин арайиъ диспансеризацияйин важиблувалин гъаврикк ккаъбан ляхин гъабхувал табшурмиш гъапIну.

Гьяракатнан штабдин заседаниейиъ удучIвну гъулху Николай Павловди 17-19-пи сентябриъ сечкйирин комиссйирин ляхин Роспотребнадзорин тIалабариз асас вуди тешкил дапIнайиваликан гъапнийи.

Вахтназ вуди РД-йин образованиейин ва илимдин министрин вазифйир тамам апIурайи Ягь’я Бучаевди сечкйирин йигъари бицIидар манзилнаъди дарсар урхуз гьаувалин ясана думу йигъари мектебариъ гъахру дарсар кьюрдун тятIиларин йигъариз алдагъбан теклиф дивну.

Сергей Меликовди дарсар гъахру йигъар жара вахтназ алдагъбан месэла тартиб апIувал табшурмиш гъапIнийи.