26-пи сентябриъ Мягьячгъалайиъ, Н.Аьшурялиевдин ччвурнахъ хъайи технический колледждин бинайиин алди, дагъустандин халачичивалин фестиваль кIули гъубшну. Дидин метлеб – жигьилариз халачичивалин сяняаьткарваликан ктибтувал, гележегдиъ думу дюбхну, артмиш апIувал вуйи. Фестивалин тешкилатчйирин фикриинди, эгер аьхю шулайи наслиз багъри макандин аьдатарикан, халкьдин сяняаьткарваларин мяднарикан артухъди мялуматар ади гъахьиш, дурарин, аьсрариинди давам шулайи ихь кюгьне аьдатар дюрхну, гележегдиъ чпин насларихьна рукьуз иштагь хьибди.

 

Гьяйифки, вари дюн’яйиз машгьур вуйи дагъустан, иллагьки табасаран халачйириз айи игьтияж аьхиримжи йисари лап цIиб гъабхьну. Хъа фила-вуш халачичивал дагъустан халкьдин дамагъ вуйи.

«Гъи фестивалин дахилнаъди гьамциб успагьи, шаду ва мянфяаьтлу машквар кIули гъябгъювалиин гизаф рази вуза. Фестивалин дахилнаъди кIули гъуху конкурсарин вари гъалибчйир РД-йин заан классариъ урхурайи баяр-шубарин Советдиз кьабул гъапIунча. Чпихьна мициб фикир жалб дапIнайивали аьхю шулайи наслиз ужуб тясир апIиди жвуван гъюзимбу уьмрихьна, артмиш’валихьна жавабдарвалиинди янашмиш хьуз гъитди. Гьацира мицдар серенжемари дурарик чпин удукьувалар, бажаранвалар хъана артмиш апIуз рюгь капIди. Ич вазифара – жигьиларин яратмиш’валин жягьтлувалариз вахтниинди фикир тувну, учхьан шлу кюмек апIувал вуйич», – къайд гъапIну Мягьячгъалайин образованиейин управлениейин отделин пишекар Сефижат Мягьямедрасуловайи.  

Фестивалиъ Н.Аьшурялиевдин ччвурнахъ хъайи технический колледждин студентари, йитим бицIидарин интернатдин баяр-шубари, «Дагъларин гьенгар» ансамблин далдабчйири сягьнайилан уч духьнайидарик гьевес капIнийи. Серенжемдин вахтна «Чарвайин хьа» конкурсдин гъалибчйириз пешкешарра тувнийи.

Фестиваль пишекарвалин гьязурлугвал гъабхбан Центрин кюмекниинди, дизайндин, экономикайин ва ихтиярарин техникумдин ва Дербентдин халкьдин сяняаьткарваларин ва туризмдин колледждин иштирак’валиинди кIули гъубшнийи.