Ихь ватанагьли Рустам Керимовди Грозныйдиъ кIули гъубшу, спортдин ктикьу жюрйириан вуйи кчIихбариан АСА 130 (Absolute Championship Akhmat) турнириъ Бразилияйин ватандаш Дэниель Де Альмейдейиин гъалибвал гъадабгъну.

 

4-пи октябриъ Грозныйдиъ АСА 130 турнирин дахилнаъди му тешкилатдин улихьгандин чемпионарин – Урусатдин вакил Рустам Керимовдин ва бразилияйин спортсмен Дэниель Де Альмейдейин – арайиъ варитIан пучIу гъагънаъ вуйи кчIихбар гъахьну. Судйирин саб вуйи къарарниинди, Керимов гъалиб гъахьну.

26 йисаъ айи Керимов 2019-пи йисхъанмина рингдиз удучIвундайи. Аьхиримжи кчIихбариъ дугъу, Бразилияйин ватандаш Франсиско де Лима Мачиель 1-пи раунддиъ нокаутдиз гьаъну, АСА-йин чемпионвалин чIул гъюбхнийи. Гьадму йисан мартдин вазлиъ Санкт-Петербургдиъ кIули гъубшу АСА 93 турнириъ дугъу Аьбдул-Рягьман Дудаевдиин гъалибвал гъадабгънийи. Гьаддин кьяляхъ дугъу чан спортдин пише давам апIбаъ танафус гъадабгънийи. Кери-мовдин гьисабнаъ гъи 15 кчIихбариъ гъалибвал а, гьелелиг думу сабкьан ражари магълуб духьнадар.

Рустам Керимов – табасаран бай ву, Дербент шагьриъ бабкан ва аьхю гъахьну. Думу спортдин жюрбежюр жюрйирин кчIихбариан спортдин мастер ву. Чан спортдин карьера дугъу ушу саньдайиан шубуб ражари дюн’яйин чемпион гъахьи Назим Абасовдин регьберваликкди ккебгъну. Гьамусяаьт спортсменди «Dagestan Fighter» кIуру клубдиъ Мансур Учакаевдин регьберваликкди гьязурлугвалар гъахура.