Гьюрматлу мялимар, мялимвалин зегьметнан ветеранар! Учву пишекарвалин машкврихъди – вари халкьарин мялимарин Йигъахъди кIваантIан тебрик апIурача!

 

Мялимдин пише дюн’яйиъ жара саб пишейихьдира тевуз шулдар, фицики инсан тербияламиш апIувал варитIан жавабдар ляхин ву. Думу пишейин эйсийиз жвуваз айи аьгъювалар жарадариз тувуз, чав тербияламиш апIурайидариз кIван ужудар гьиссар ачмиш апIуз улупузра аьгъяди ккунду. Мялимдин бажаранваликан, устадваликан, зигьимлуваликан дугъу тербия туврайидарин сагъламвал, ватандаш’валин фагьум, гележег асиллу шула. Ляхнихьна вуйи ккунивал, бицIидар ккунивал – мялимвалин гъагъи ва баркаллу зегьметнан бина ву.

Гьарсар инсандиз бицIи вахтна читин ва жавабдар ляхниз вафалу вуйи халис мялим алахъуру. Дицир мялимди бицIи инсандиз уьмрин рякъ, аьхю гъахьиган пише ктабгъуз кюмек апIуру. Дицисдар мялимари инсандин уьмриъ аку шил гъибтру. Гьаддиз гьаму машквар вари халкьаринуб ву гъапишра, дюзди гъюру.

Гьюрматлу мялимар, бицIидар тербияламиш апIури, баркаллу зегьметнан рякъ ккадапIу, кIван ялав ухьуз, варитIан багьалу бицIидариз, туву ветеранар, ичв зегьметназ аьхю аферин! Газатдин редакцияйин коллективди, учву пишекарвалин йигъахъди тебрик апIури, учвуз жандин мюгькам сагъ’вал, мектебдиъ гьюрмат, ляхниъ заан хъуркьувалар, хизандиъ хушбахтлувал ккун апIура.