Жиниб дар, Дагъустан Республикайин муниципалитетарин арайиъ ЖКХ-йин цирклиан гьял дарапIди гъузнайи варитIан гизаф месэлйир айи шагьур Дагъустандин Огни ву. Шагьур ара адарди тувру электроэнергияйихъди, кьюрдун фаслиз вуйи манишнахъди, марцци штухъди лап кьитдитIан тямин дапIнадар.
«Табасарандин нурар» газатдин 39-пи нумрайиъ чап дапIнайи «ЖКХ-йин месэлйир гьял апIувал зяифди гъубзра» макьалайиъ Дагъустандин Огни шагьур кьюрдун вазари электроэнергияйихъди ва манишнахъди тямин апIбан бадали гъахурайи ляхнарикан мялуматар тувнийча. Хъа гъийин макьалайиъ шагьур штухъди тямин апIбан мес-элайикан улхуз ккундузуз.
РД-йин экономикайинна аьтрафарин артмиш’валин министерствойин пресс-гъуллугънаан туврайи мялуматариз асас вуди, «Кафари Кавказдин федеральный округдин армиш’вал» гьюкуматдин программайин дахилнаъди 2022-2024-пи йисарин арайиъ Дагъустандин Огни шагьур марцци штухъди тямин апIбан гъурулуш рас ва цIийи алапIуз планламиш дапIна. Думу проект уьмриз кечирмиш апIуз 360 миллион манат жара апIиди. Гьаму дакьатарин кюмекниинди улупнайи йисарин арайиъ шагьрин штун гъурулуш бегьемди цIийи алапIиди ва гьамусяаьт лап читинди дийибгънайи месэла гьял дапIну ккудубкIиди.
Улихьна йигъари РД-йин Правительствойин председатель Аьбдулпатах Амир-хановдин регьберваликкди, дугъан заместитель Манвел Мажонц, РД-йин Главайин администрацияйин кIулиъ айирин заместитель Арслан Сайпуллаев, РД-йин тикилишчивалин ляхнарин министр Артур Сулейманов ва Дагъустандин Огни шагьрин глава Жалалудин Аьлирзаевра иштирак духьну, шагьриз шид зигбан бадали планламиш дапIнайи проектдин документар гьязур апIбан гьакьнаан совещание гъабхьну.
Къайд апIуб лазим вуки, му проект кIулиз адабгъбан бадали тешкил гъапIу тендериъ «Югпроектстрой» тешкилат гъалиб гъабхьну.
Республикайин экономи-кайинна аьтрафарин артмиш’-валин министерствойин пресс-гъуллугънаан учуз туву мялуматариинди, гьамусяаьт документар гьязур апIбан ляхнар кIули гъягъюра, хъа думу ляхнариз харж шлу дакьатар Республикайин инвестицйирин программайин дахилнаъди региондин бюджетдиан жара дапIна. Му объект пландик кипбан бадали, вари документарра хъади Урусатдин Федерацияйин экономикайин армиш’валин министерствойиз тялукь кагъаз хъадапIна.
