Улихьна йигъари Дагъ. Огни шагьрин глава Жалалудин Аьлирзаевди коронавирусдин инфекция тарабгъувализ аькси нубатнан заседание кIули гъубхну.
Заседаниейиъ иштирак гъахьи Дагъ. Огни шагьрин больницайин кIулин духтир Жамиля Важибовайи туву мялуматариинди, COVID-19 уьзрин лишнар кади аьзарлу духьну, аьхиримжи йигъари больницайиъ ккаъдарин кьадар 37 кас ву, дурарикан 4 кас лап читинди гьялнаъ ади каъну. Дагъ. Огнийин 6050 касди вакцинайин рубар йивна.
«Улихьди аьзарлу шулайидар гизафси яшлу касар вуйи, хъа гьамус коронавирусдиан жигьиларра ктIерццура. Хъяркънайи йишвариъ, иллагьки сумчрар апIру аьхю дараматариъ, гизаф инсанарин иштирак’валиинди жюрбежюр серенжемар гъахувал къадагъа апIбан гьякьнаан кьабул дапIнайи къарар варидари тамам апIурадар», – мялумат тувнийи Дагъ.Огни шагьрин ЦГБ-йин кIулин духтри.
Заседаниейиъ шагьрин кIулиъ айи Жалалудин Аьлирзаевра удучIвну гъулхнийи.
«Гьюрматлу Дагъ. Огни шагьрин жямяаьт! Гъи узу учвхьинди аьхю тIалабниинди илтIикIураза. Гьамусяаьт ихь вари уьлкейиъ гьял апIурайи асас месэла – коронавирусдин уьзур ву. Му уьзрихъди аьлакьалуди инсанарин уьмриъ гизаф дигиш’валар гъахьну, саб гафниинди, му уьзри ухьу чан йисирар гъапIну. Коронавирусдин тIягъюн ихь арайиз дуфну кьюдпи йис шула, амма, ич гьисабариинди, аьзарлуйирин кьадар цIиб шуладар. Гъи, ухьу вари сатIи духьну, му уьзрихъди аькси женг гъабхбан месэла гьял дапIну ккунду. КIулиан инсанарира му уьзриз думукьан фикир туври гъахьундар, вари ктIерццурайидара, йихурайидара яшлу касар вуди гъахьну. Хъа гъи, ухьуз ихь духтрари, аьлимари текрар апIурайиганси, му уьзри жигьиларизра инсаф апIурадар. Фукьан вушра хатIалу уьз-рихъди дюшюш гъахьунхьа, ва гъи ухьу дидихъди женгра дубхну ккунду. Духтрари кIурайиганси, учву саб бицIиди гьии дарувал гьисс апIуз хъюгъюбси гьяракат дапIну больницайиз душну ккунду. Саспи инсанар, хулаъ имиди сагъ шулуча кIури, духтрихьна илтIикIудар. Хъасин уьзур лап яман гьялназ гъафиган, больницайиз гъягъюру. Думу вахтна сарун сар Аллагьдик миж кивну ккунду. Думу узриан узура ктIерццунзу, ва вахтниинди духтрихьна илтIикIували ухди сагъ хьузра мумкинвал тувунзуз. Инсан, гьюжатар апIури, духтрар тахсиркар апIури, дугъужвну ккундар. Гьарсар касдин чан сагъ’вал чан хилиъ айиб ву. Ихь духтрариз ухьу аьхю чухсагъул дупну ккунду. Дурар, йигъ-йишв дарпиди, чпин уьмур гьяйиф дарапIди, аьзарлу духьнайидариз лигура. Духтрар ва медсестрйир гъийин девриъ игит касар ву. Чпиз алахьурайи читинвалариз дилигди, дурарикан гьарсари ватандашарин уьмрихъан жавабдарвал гьисс апIура. Дагъ. Огни шагьрин больницайин хайилин духтрар Урусатдин Президент Владимир Путиндин ва Дагъустан Республикайин Глава Сергей Меликовди терефнаан гьюрматнан грамотйириинди лишанлу гъапIну, ва гьаму гъагъи вахтна дурари гъабхурайи баракаллу зегьметназ аьхю чухсагъул гъапну.
Йиз учвухьна вуйи илтIикIубра, гьарсар касди вакцинайин руб йивну, уьз-рихьан ярхла хьувал вуйиз», — гъапнийи Дагъ.Огни шагьрин главайи.
Гьюрматлу ватанагьлийир! Гъи ухьухьна, жвуван сагъламвализ хъайивал апIинай кIури, жямяаьтлугъ йишвариъ маскйир алдарди милицинай, коронавирусдихьан уьрхру прививка апIинай, гизаф инсанар уч шлу йишвариз (саламариз, сумчрариз, мавлидариз) чарасуз вудитIан мягъянай кIури, духтрар, республикайин кIулиъ айидар, больницйирин кIулин духтрар кми-кмиди илтIикIура. Ковид уьзрихъди арайиз дуфнайи аьгьвалат хъана читин шула — аьзарлу шулайидарин кьадар гьам уьлкейиъ, гьам республикайиъ йигълан-йигъаз артухъ шула. Чвулин вахтна арайиз гъюру грипп уьзрианра хайлин касар аьзарлу духьна. Гьаму шартIариъ гьарсар касди, духтрихьан кюмек ккун дапIну, чан бедендиз хъайивал апIувал ва вахтниинди вакцинайин руб йивувал лазим ву. КIваинди гъибтай, ичв сагъламвал сифте нубатнаъ учвкан асиллу ву
