2006-пи йисан 28-пи сентябриъ Дагъустан Республикайин Халкьдин Собраниейи «РД-йин Жямяаьтлугъ палатайин гьякьнаан» къанун кьабул гъапIнийи. Гьаддин кьяляхъ, республикайин Жямяаьтлугъ палатайин гъурулуш яратмиш дапIну, 2007-пи йисан апрелин вазлиъ сабпи яркьу заседание гъабхьнийи. Дидин ляхин къайдалу апIбан бадали, 2015-пи йисан палатайин аппаратра ачмиш гъапIнийи. Магьа, РД-йин Жямяаьтлугъ палата гьяракатнаъ ади, 15 йискьан ву.
Дидин асас метлеб фу ву кIури, гьерхиш, Жямяаьтлугъ палатайи, республикайин гьюкуматдин, экономикайин ва яшайишдин артмиш’валин гьял дапIну адру месэлйир ахтармиш дапIну ва арайиз адагъну, дурар гьял дапIну ккуни тялукь идарйирин улихь-кIулихь хьайидарин ва жямяаьтлугъдин вакиларин иштирак’валниинди улхбар (хъпехъбар), заседанйир, ва «гергми столар» тешкил, тялукь идарйириз табшуругъар гьязур дапIну, хътауру. Палатайин гъуллугъчйири, месэла фици гьял апIураш, улупнайи вахтнан арайиъ хабар дебккру.
Жямяаьтлугъ палатайин асас вазифа – гьюкуматдин ва ерли самоуправлениейин органари важиблу къарарар кьабул апIруган, жямяаьтлугъдин фикир гьисабназ гъадабгъбан гъурулуш ва ватандаш’валин институтар яратмиш апIбан гьяракат артмиш апIувал ву.
Гьаци, ватандашарин ва жямяаьтлугъ тешкилатарин республикайин гьюкмин ва ерли самоуправлениейин органарихъди аьлакьа дебккри, конституцияйин ихтиярар, азадвал ва къанунчивал уьбхюз диш дапIнайи, халкьдиз хайирлу жягьтлуваларин тереф уьбхюри, РД-йин къанунарин проектарин, гьюкмин идарйирин ихтиярарин актарин проектарин жямяаьтлугъ экспертиза гъабхуру. Дидлан савайи республикайиъ айи гьюкмин федералин органарин, РД-йин гьюкмин тамам апIру органарин ва ерли самоуправлениейин ляхнин зиин ва гьацира вари хабрарин дакьатариъ гафнан азадвал уьбхбиин жямяаьтлугъ гюзчивал гъабхуру, РД-йин гьюкмин идарйириз табшуругъар дюзмиш апIуру, районариъ тешкил дапIнайи жямяаьтлугъ палатйириз мялуматарин, методикайин ва жара кюмек тувру, ватандашар, жямяаьтлугъ тешкилатар, хабрарин дакьатарин вакилар важиблу месэлйир гьял апIбахьна жалб апIуру, айи ихтиярариз асас вуди, регионарин арайиъ аьлакьйир тешкил апIуру.
Жямяаьтлугъ палатайи гъурулуш 45 касдикан ибарат ву, ва дурар шубуд йисазди ктагъура. Палатайин членари тялукь комиссйирин дахилнаъди ляхин апIура. Важиблу месэлйир гьял апIруган, рабочий дестйирра дюзмиш апIури шулу.
Аьдати агьалйирихьан гъюрайи аьрзйириз лигували Жямяаьтлугъ палатайин ляхниъ асас йишв бисура. Дурар, тялукь комиссйири ахтармиш дапIну, гьял апIбан рякъяр агура.
Сабпну арайиз гъафи вая йисариинди гьял апIуз удудукьрайи читин месэлйирин гьякьнаан жямяаьтлугъ улхбар, заседанйир, «гергми столар» тешкил апIури, дурар арайиан адагъбан бадали, уьлчмйир кьабул апIура.
15 йисандин юбилейихъди мубарак апIури, Дагъустан Республикайин Жямяаьтлугъ палатайиз чан асас вазифйир умудлуди кIулиз адагъуб ккун апIурхьа.
