Дагъустан Республикайин дагълу терефариъ яшамиш шулайи малдарари чпин мал-къара кьюрдун вахт адапIуз галариз хъапIуз хъюгъна. Асас вуди мал-марчч октябрин вазлиан мартдизкьан галариъ гъибтри шулу.

 

Дагъустан Республикайин гъулан мяишатдин ва ипIру-убхъру сурсатарин министрин сарпи заместитель Шарип Шариповди мялум гъапIганси, цци республикайин 1,3 миллион кIул чарвйири кьюрдун вазар галариъ адаиди.

«Гъулариан чарвйир галариз хъаъри, хайлин йигъар ву. Гъийин йигъаз 200 агъзуртIан артухъ чарвйир шилди гъя-гъюри галариз хъаъна, хъа 30 агъзуртIан артухъ – машинариъди духна. Эгер мархьар дурургъри, гьавайин шартIар ужудар вуди гъахьиш, гьаму йисан галариз хъауз планламиш дапIнайи 1,3 миллион чарвйир вари 25-пи октябриз хъаъну ккудукIиди.

Мидиз улихьна йисариз гъилигиган, цци мал-къара галариз хъапIуз кьан гъабхьну. Фицики октябрин эвелариъ ургъури гъахьи мархьар, дагълу районариъ дахьу йифар себеб духьну, рякъяр чIур хьували му ляхниз манигъ’вал гъапIну. Гьамусяаьт рякъюъди чарвйир, малар хъаъну гъягъюз гьавайин шартIар ужудар ву. Мал-къара кьабул апIуз галарра ужуб гьялнаъ а, ва лазим вуйи кьадар алафарихъдира тямин дапIна»,

– гъапну Шарип Шариповди.

Йиз сюгьбатчийин гафариинди, гъябгъюрайи йисан булди мархьар ургъувализ лигну, галар айи зонйирин жилар чуру укIру ккаъна.

«Ццийин йис сачдин гьаму вахтнахъди тевиш, гьамусяаьт зонйириъ айибсиб чурушин сач адайи. Гьаци вуйивализ лигну, сач уч дапIнайи алафарра ухди ккахьуз хъюгънийи. Гьаддиз, сачдин аьгьвалат цIиб гъагъиб гъабхьивал гъябкъиган, цци алафар артухъди гьязур гъапIну. Галариъ алафар мартдин вазлизкьан гьуркIди кIури, умуд кивраза», – аьлава гъапIну министрин заместители.

Табасаран ва Хив районарин мал-къарайикан улхуруш, Табасаран райондиъ кьюрдун вазари гизаф аьхълушин шулдар, гьаддиз мал-къара райондин аьтрафариин гъубзра, хъа Хив райондин мал-къарайи кьюрдун вазар Дербент зонайин галариъ адаури шулу.