Табасаран райондин ЦБС-диъ библиотекарди лихурайи Гьялимат Хизриевайи ва Хючнаарин 1-пи нумрайин лицейдин мялим Мадина Мазалаевайи газатдин редакцияйиз пешкеш вуди бицIи халачи ва кагъаз хътаъну. Думу кагъзиъ табасаран халачи фици арайиз гъафиб вуш ктибтурайи кьиса тувнайи. Дидихъди газат урхурайидар таниш апIурача.

«Саб гъулаъ Сафар кIуру риш яшамиш шули гъахьну. Думу шураз бирхуз, атIнар урхуз, кабчуз, вари хилин ляхнар апIуз аьгъяди гъабхьну. Саб ражари кюкдин багъдиъ дуснайи Сафар, фици халачи аьмалназ хибдикIан кIури, фикрарикк ккахъру. ГакIвлин дуркьар дивну, дугъу гиришал зигуз хъюгъну. Сафари гъапнийи: «Ихь ригъдин нурар фици гьюдюхюри гъахьнуш, гьацIар исинди, хъа гьацIар зиинди – му гиришал ву».

Сафари, лизи мурсул дибисну, дидиз таб йивури, «ихь бистнарин арчлар фици ургъуруш, гъит му арчал ибшри», кIуру. Ирар-табар ккудукIиган, укIу мурслин кьюб раж алахьну, «гъит му ихь яркьу рякъ ибшри», кIури, фикир апIуру. Рякъюъди марччарин лижар гъягъюри гъахьну – кьюб лизи, кьюб кIару раж алахьну, дугъу «му цIару кьятIил ву» гъапи. Сафари, ярквраз лигури, душваъ гьарари фици кюкю адабшвураш, фици дурарин цирклариин жакьвар дуснаш, чимлин гьари фици кьюкь апIураш – ихь табиаьтдин вари гюрчег’вал чан халачийиъ атIабгну.

Дидхъан мина варжариинди йисар гъушну, амма гьарган, халачи гъябкъиган, зигьимлу табасаран риш кIваина гъюру».