Урусатдиъ коронавирусдин уьзриан аьзарлу духьнайи инсанар сагъ апIуз сад йигъандин арайиъ 3,6 млрд манат харж апIура, мялумат тувну РФ-дин финансарин министр Антон Силуановди улихьнаси сенаторарихъди гъабхьи гюрюшдиъ. Дугъан гафариинди, уьзур гъизгъин хьуз хъюбгъю вахтари дидихъди женг гъабхуз сагъламвал уьбхбан цирклиъ 2-дилан 3,6 млрд манатдиина харж апIура.

 

А.Силуановди къайд гъапIганси, сагъламвал уьбхбан гъурулушдиз кюмек вуди, гьаму йисан аьлава гъазанжар деетбанди ву. РФ-дин сагъламвал уьбхбан министерствойихъди сатIиди лазим вуйи пулин кьадар гьисаб дапIна. Думу 50 миллиардтIан артухъ ву. Гьамусяаьт РФ-дин Правительствойиз дидин гьякьнаан теклиф гьязур апIура.

Дупну ккундуки, аьхиримжи йигъари уьлкейиъ коронавирусдиан йихурайидарин кьадар артухътIан артухъ шула. Думу тIягъюн ачмиш гъабхьихъанмина аьзарлу гъахьидарин кьадар 8 миллионтIан гизаф ву. Читин аьгьвалат ихь республикайиъра арайиз дуфна.

Республикайин клиникайин 2-пи нумрайин больницайин кIулин духтир Ибрагьим Мягьямедовдин гафариинди, COVID-19 уьзриан гъагъиди кетIерццнайир сагъ апIуз 100 агъзуртIан артухъ пул харж шула. «Улихьнаси реанимацияйиъ ади гъахьи гьарсар аьзарлу сагъ апIуз миллион манаттIан артухъ пул харж гъапIнийи», – кIура Мягьямедовди.

Дугъу аьлава гъапIганси, коронавирусдиз аькси саб рубдин кьимат агъзур манат ву.