Гъябгъюрайи йисан, бюджетдин тяминвал къайдайиз хпан бадали, уьлкейин регионариз жара дапIнайи пулин дакьатарикан варитIан аьхю дотация Дагъустандиз тувбанди ву.

 

 

Айи мялуматариинди, гьаму йисандин натижйириз лигну, ихь республикайиз 72, 9 млрд манат жара апIиди. Дагъустандин кьяляхъди Якутияйиз – 51,6 млрд манат, Камчаткайин крайдиз – 41,1 млрд манат, Чечен Республикайиз – 33,5 млрд манат тувди.
Гьаму йисан вари субъектариз пай апIурайи дотацйирин уьмуми кьадар 718 млрд манат ву.

Му дакьатар асас вуди инфраструктурайин объектариз ва яшайишдин буржар тамам апIуз диш дапIнайидар ву.
Мялум вуйиганси, Кафари Кавказдин республикйириъ, гьадму гьисабнаан Дагъустандиъра, ерли экономика къайдайиз хпан месэла учIруди дийибгъна. Мушвариъ бизнесдин аьхюну пай жинивалиъ гъубзрайивализ лигну, налогар тутруврайивалиан бюджетдиз гъазанжар гъювал асккан дережайиъ а. Диди республикйир дотац-йирикан асиллу хьуз гъитра.

Бюджетарин тяминваликан улхруган, Урусатдин кафари терефнаъ гьял ужуб ву кIури, хиял шулу, фицики душвариъ нафтлин аьхю компанйири, дугъриди налогар туври, ерли бюджетариз артухъди гъазанжар гъюз гъитра. Хъа регионариъ, аьдати экономикайин шартIариъди, вари гъазанжар гьисабназ гъадагъуз удукьурадар, гьаддиз налогар тувувалра зяифди ву.

2021-пи йисан варитIан аьхю дотацйир гъадагъурайи Дагъустан, Камчаткайин край ва Якутия экономика жигьатнаан жюрбежюр дережйириъ айи субъектар вушра, гъийин аьгьвалатнаъ агьалйириз кюмекнан хил гьачIабккбан месэла кIакIнаъ дебккна, фицики му регионариъ экономикайин гъурулуш гизафси хусуси мяишатариин биналамиш дубхьна. Гьаддиз дурариз артухъдиси кюмек тувбан къарар адабгъну.