Росстатдин Дагъустандиъ айи отделениейин кIулиъ айи Айгьанат Эфендиевайи туву мялуматариинди, октяб-рин 26-пи йигъаз Дагъустандиъ саб миллиондиинакьан агьалйир вари Урусатдин агьалйир гьисаб апIбан ляхниъ иштирак гъахьну.
Учу улихьнара мялум гъапIганси, Урусатдиъ, 15-пи октябрилан башламиш дапIну, 14-пи ноябризкьан перепись кIули гъябгъюра. 26-пи октябриз вуйи улупбариинди ккудушу йигъарин арайиъ Дагъустандиъ яшамиш шулайи агьалйирин 35% гьисабназ гъадагъну. Инсанар гьисаб апIбан ляхин гъабхурайи касари 900 агъзур кас (29%), «Госуслуги» порталиъ 190 агъзур кас (6%) гьисабназ гъадагъну.
Айгьанат Эфендиева-йин гафариинди, инсанар гьисабназ гъадагъбан ляхниъ, Урусатдин регионарин улупбарихь тевиган, Дагъустанди кьялан йишв дибисна, думу хъуркьувалин улупуб ву. Гьаци вушра, Дагъустандиъ «Госуслуги» порталиан перепись гъабх-бан ляхин кьяляхъ хъа.
ГьапIуз-вуш гизаф инсанар переписдин ляхнихьан ярхлади гъузна. Республикайин 13 муниципалитетдиъ – Ахъуша, Ахты, Докъузпара, Къиз-лар, Къурагь, Лак, Мягья-рамкент, Нугъай, Рутул, СтIал-Сулейман, Тару-мовский, Хунзах, ЧIарада районариъ переписдиъ 50% агьалйир иштирак духьна. Хасавюртдиъ – 13%, Къизилюртдиъ – 15%, Буйнагъскдиъ – 22%, Мягьячгъалайиъ – 23%, Дер-бентдиъ – 23% агьалйиртIан переписдиъ иштирак духьнадар.
Газат урхурайидариз узу фици переписдиъ иштирак гъахьнуш, гьаддикан ктибтуз ккундузуз. «Госуслуги» порталиъ переписдиъ иштирак хьувал ккун апIура, хъа шулуш, телефондиан ваъ, компьютерихъ рягьятди вуйиваликанра дупна. Гьаддиз узу, переписдиъ иштирак хьувалин ният ади, компьютерихъ «личный кабинетдиъ» пароль бикIури дусунза. Пароль кIваълан дурубшбан бадали, думу кагъзик дибикIнайиз. ЙицIубан чарйир гъапIнийза, аммаки «личный кабинетдиъ» учIвуз гъабхьундайзухьан. Хъайигъан МФЦ-йиз душну, операторихьан цIийи пароль гъадабгънийза. ЦIийи паролин кюмекниинди «личный кабинетдиъ» учIвну, суалариз жавабар тувуз хъю-гъюнза. Гьелбетда, суалар читиндар дар, жавабар тувуз рягьятди шулу. Переписдиъ иштирак хьувализ чухсагъул мялум апIури, телефондиз «Госуслуги» порталиан QR-код хътапIуру.
Гьюрматлу ватанагьлийир! Агьалйирин перепись гъабхбан ляхнин гъирагъдиъ мугъузанай. Учу улихьнара гъапиганси, ичв иштирак’валикан учву яшамиш шулайи йишван (шагьрин, гъулан) артмиш’вал асиллу хьибди. Инсанари дюзди туву жавабариз дилигну, гьюкуматди чан экономический политика уьмриз кечирмиш апIиди. Переписдин натижйириз дилигну, регионарин агьал-йирин яшайишдин ери за апIуз лазим вуйи къарарар кьабул апIиди.
