Гъябгъюрайи йисан 1-пи ноябрилан башламиш дапIну, бизнесдиз льготйирин кредитар тувуз хъюгъди. Коронавирусдин тIягъвникан зарар гъабхьи цирклариз льготйирин кредитар тувуз РФ-дин Правительствойи 20 млрд манат жара гъапIну.
РФ-дин премьер-министр Михаил Мишустинди мялум гъапIганси, бизнесдиъ ляхин апIурайи фягьлийириз маважиб тувбан месэла гьял апIури, гьаруриз саб МРОТ-дин гьисабнаан, бизнесменариз – 3 процент алди кредитар тувбан гьякьнаан вуйи программа Правительствойи гьязур дапIну ккудубкIура. Хъасин кредит сабсдар паяриз жара дапIну, думу 12 вазлин арайиъ ктипуз мумкинвал хьибди.
Мидланра савайи, министрарин кабинетди коронавирусдиан варитIан аьхю зарар гъабхьи циркларин бицIи ва кьялан бизнесдиз грантар тувбан кьадарра тасдикь апIиди. Дурариз жалб дапIнайи дакьатарин уьмуми кьадар 38 млрд манат ву.
Гьацира Центробанкди коронавирусдин тIягъвни зарар туву бицIи ва кьялан дилаварчивалин субъектариз льготйирин кредитар тувуз 60 млрд манат жара апIбанди ву.
