Урусатдиъ 2021-пи йисан июлин вазлихъан мина полицияйи, COVID-19 уьзриз аькси рубар йивбан гьякьнаан кучIли сертификатар ва жара документар тувбахъди аьлакьалу вуди, 500-тIан артухъ уголовный делойир гъитIирккну. Думу жюрейин къанунсуз ляхнарин иштиракчйир вуйи 293 кас ашкар дапIна.
Урусатдин МВД-йин подразделенйири ва регионарин айтIан ляхнарин органари коронавирусдиз аькси рубар йивбан гьякьнаан кучIлин сертификатар, QR- кодар, ПЦР-тестарин натижйир кайи, гьацира бедендиъ гизаф кьадар антитела айивал улупру, COVID-19-диз аькси руб йивуз ихтияр адру кучIлин справкйир тувувализ аькси серенжемар гъахувал давам апIура.
Гьаму йисан октябрин 18-24-пи йигъари Урусатдин МВД-йин регионарин органари, коронавирусдин уьзрихъди аьлакьалу цирклиъ къанунсуз ляхнар ашкар апIбан бадали, 1326 жюрейин серенжем кIули гъухну. Тахсиркарвалин лишнар кайи 14 уголовный дело гъитIирккну. Къанунсуз ляхнар апIбахъди аьлакьалу 26 кас, кучIлин документар туврударикан мялуматар тарагъру 216 интернет-ресурсар ашкар гъапIну. Урусатдин МВД-йиан туврайи мялуматариинди, думу жюрейин ляхин гележегдиъра хъана жанлуди кIули гъабхиди.
