«Коронавирус» кIуру гаф гъеебхьиган, кIваз лап аьзият шулайи касар гъи ихь арайиъ гизаф а. Эвелиан уьзур тарабгъурайивалихъ хътругъри, духтрари кIурайиб дарапIри, хъасин, чпик уьзур кубчIвиган ясана дидин чIуру тясир жвуву гьисс гъапIиган, чпи духтрарин гафариз иб тутрувувалиин швумал духьнайи касарра фукьан вушра рякъюрахьуз. Гъи, дугъриданра, коронавирусди хажалатнакк ккидриту инсанар дихъуб читинди ву.
Гьамусяаьт, вари дюн’яйиъси, Дагъустан Республи-кайиъра коронавирусдихъди вуйи агьвалат йигълан-йигъаз гъизгъин шула. Уьзриан ктIерццурайидарси, йихура-йидарин кьадарра, гьелелиг, кам шуладар. Саб суткайиъ, кьялан гьисабариинди 8-10 аьзарлу духьнайидар йихурайиваликан аьгъяшра, ихь ватанагьлийириз уьзриз аькси прививкйир апIуз гьаз-вуш гучIура.
Гьяйифки, му къурхулу уьзри ич хизандизра чIуру тясир гъапIну. Сагъди айи йиз сижар-баб, жандин кефйир адрувализ ва температура за хьувализ лигну, медицинайин тяди кюмекнан духтрариз дих дапIну, больницайиъ ккаънийча. 12 йигъандин арайиъ больницайиъ дахънайирин гъурдлар лап хараб духьну, жигьил дишагьли кечмиш гъахьнийи. Му гьядисайин кьяляхъ саб вазлилан кечмиш гъахьи йиз сижар бабан аьхю- ну чвера, гьяйифки, гьаму пис уьзри уьмриан гъухну.
Му жюрейин мисалар фукьан вушра хуз шулу. Му уьзриан саб хизандиан 2-3 кас гъийиху хизанарра фукьан вушра а. Гьяйифки, гъийин аьгьвалат гьамциб ву. Магьа газат урхурайидар, вазтIан артухъ вахтна больницайиъ дахъну гъахьи ихь ватанагьли ФатIимат Гьяжиева (дугъан тIалабниинди ччвур дигиш дапIнача) аьзарлу хьпан дюшюшдихъдира таниш апIураза.
«Коронавирус гьамкьан гъагъи уьзур ву кIури, фикиркьан дайиз. Бедендин гьял ужу дарувал, кьувватсузвал гьисс апIурайири термометр ккивнийза. Бедендин температура жизбиди за дубхьнайи, сацIиб вахтналан яваш-явашди уьгь-йирра апIуз хъюгънийза. Гьар-ганси, му ражнура ихь аьдати жюрейиинди дармнар ва шми ипIруб ипIури, гизаф чай убхъури гъахьунза, амма жандиз рягьят шуладайи. Духтрихьна гъягъюз мажбур гъахьунзу. Духтри, хулаъ гъузну, дармнар кьабул апIбан теклиф дивнийи.
Саб гьяфтайин арайиъ кьабул апIури гъахьи дармнарикан зат кюмек дархьиган, узу сагъ даршулайиб рябкъюри, больницайиз гъушунза. Гьар йигъан 2 ражари капельница ккиври, фуниз 4 руб йивури, хайлин дармнар итIури, саб вазлин арайиъ больницайиъ дахъну имиза. Гьаму вахтнан арайиъ фукьан вушра гъагъи гьялнаъ айи иццурайидар, му уьзриан гъийихдар гъяркъюнзуз. Саб бицIи вахтнан арайиъ жандин гьял швнуб-саб жюрейиинди дигиш шуйи, гьаддихъди сабси гевюлра. Ликар-хиларра яманди иццури шуйи. Гьамус больницайиан удучIвну хулаз дуфну саб вазкьан вуйиз, аммаки гьелелиг нефес хътабгъуз читинди вузуз», – гъапнийи йиз сюгьбатчийи.
ФатIимат Гьяжиевайин гафариинди, сабансан ражну мициб аьзият зигайиз, думу чарасуз вуди коронавирусдин уьзриз аькси прививка апIуз гьязур ву, уьзрин кьяляхъ тялукь вахт улдубчIвайиз ккилигура.
Дарпиди гъибтуз шуладарзухьан, прививкайиз аьксиди удучIвру касарин аьхюнубсиб пайну, чиб иццру хьпан кьяляхъ, саб гафра дарпиди, жвуван хушниинди прививкйир апIура. Фицики гъавриъ гъахьну: уьзрин иццрушнан суза зигайиз, прививка апIувал швнуб-саб ражари рягьятди ву.
Сач коронавирус тарабгъуз хъюгъю вахтари гизафси иццру шулайидар яшлу касар вуйи. Хъа цци му уьзур жигьиларикра кубчIвра, гьятта бицIидарра иццури а. Аьгьвалат гъагъиди айивализ ва уьзур кьяляхъ дурубш-райивализ лигну, уьлкейин Президент Владимир Путинди 30-пи октябриан 7-пи ноябризкьан дилихру йигъар тяйин гъапIну. Му къарар адабгъбан асас себеб – цIиб вахтнакьан инсанар хулаъ гъузну, уьзур сар-сарихьна тарабгъувалин улихьишв гьадабтIувал ва прививка дарапIу касариз думу апIуз азад вахт тувувал ву. Гьаддиз, гьюрматлу ватанагьлийир, прививка дапIну адрудар аш, гьаму йигъарин арайиъ думу апIинай, дарш чарасуз ляхин адарди хулариан муудучIванай.
