Уьлкейин имбу регионарин агьалйирихьан, Дагъустан фициб йишв ву, кIури гьерхиш, дурари дишлади, уччвуб табиаьт, ягъал дагълар, Каспий гьюл ва, гьаддихъди сабси, гизаф спортсменар айи республика ву кIури, жаваб тувру. Дугъриданра, Дагъустандин спортсменарин кьадар йигълан-йигъаз артухъ шула. Дурари, чпи улупурайи гьунарариинди, ихь респуб-ликайинси, жвуван бицIи макандин – гъулан адра за апIура.

 

Гьадрарин арайиъ ихь ватанагьли, Дербент райондин Рубас гъулан агьали Сабир Айдемировра а. Октябрин вазлиъ Татарстан Республикайин Казань шагьриъ кчIихбан самбойиан кIули гъушу Урусатдин талитариъ 85 килограмм гъагъишин айи спортсменарин арайиъ думу 3-пи йишван сагьиб гъахьну. Му талитариъ иштирак хьайиз улихьна майдин вазлиъ Санкт-Петербург шагьриъ кIулиъ гъубшу шагьрин чемпионатдиъ 2-пи йишв гъадабгъган, Сабир Айдемиров Казандиъ гъябгъру Урусатдин чемпионатдиъ иштирак хьуз гъядягъну.

Чан яш 11 йис гъабхьихъан мина спортдиин машгъул вуди, думу Асгьяб Сефербеговдин ва Сяид-Аьгьмед Мислимов-дин тренерваликкди кчIихбан самбойиин машгъул духьна. Сабир спортдин устадра ву.

Гьамусяаьт дугъу Санкт-Петербург шагьрин военный академияйин сабпи курснаъ урхура. Чав кадабгънайи кесп читинуб вушра, ихь спортсмен спортдихьан зат ярхла шуладар. Военный академия-йиъ думу тренер Андрей Калмыковдин хиликкди армияйин хиларихъди кчIихбан спортдин жюрейиин машгъул духьна.
Гъит Сабир Айдемировдиз спортдиъ хъанара аратухъ хъуркьувалар ишри.