Дагъустандиъ аьхю кьадарнаъди бицIидарин багъар ва мектебар тикмиш апIура. Федеральный ва республикайин программйирин дахилнаъди 2021-2024-пи йисари образованиейин дараматар дивувал планламиш дапIна ва му ляхин кIули гъябгъюра. Гьаму муддатнаъ уьмуми кьадар 190 дарамат дивбанди ву, гьадму гьисабнаан 37 агъзурна 685 ученик кьабул апIру йишвар ади 105 мектеб ва 12 агъзурна 18 бицIириз йишвар айи бицIидарин 85 багъ.
Гьаму улихьнаси Дагъустандин Правительствойин председатель Аьбдулпятягь Амирхановдин регьберваликкди гьаму месэлайиз бахш дапIнайи совещание гъабхьну. Душваъ тялукь министерствйирин, идарйирин, муниципалин образованйирин администрацйирин вакиларихъди мектебар ва бицIидарин багъар тикмиш апIбан рякъюн картайин серенжемарин гьякьнаан улхбар гъухну.
Гьацира «Демография» ва «Образование» милли проектарин дахилнаъди «ГВСУ-4» ФГУП-ди тикмиш апIурайи дараматар ахтармиш гъапIну.
Аьбдулпятягь Амирхановди къайд гъапIганси, сабишв’инди аьхю кьадар дараматар тикмиш апIурайивал гьисабназ гъадабгъну, дидин зиин аьлава гюзчивал гъабхбан бадали, тамам апIру гьюкмин органарин улихь-кIулихь хьайидарин арайиан жавабдар касар тяйин апIиди. Дурари мектебар ва бицIидарин багъар диврайи ва дивуз планламиш дапIнайи шагьрариъ-районариъ кураторвал апIиди.
Вахтназ вуди РД-йин илмин ва образованиейин министрин вазифйир тамам апIурайи Ягь’я Бучаевди мялум гъапIганси, тикмиш апIурайи мектебарин уьмуми кьадарнакан 55 мектеб дивуз «Образованиейин артмиш’вал» РФ-дин госпрограмайин дахилнаъди пул деебтбанди ву, хъа дурарикан 16 мектеб тикмиш апIуз подрядчикарди Урусатдин оборонайин министерствойин ГВСУ-4 ФГУП тяйин дапIна.
«41 мектеб – Республикайин инвестицйирин программайин дахилнаъди, 3 мектеб – «Гъулан йишвар сабишв’инди артмиш апIбан» госпрограммайин, 6 – «РФ-дин ватандашар гъулай хуларихъди ва коммуналин гъуллугъарихъди тямин апIбан гьякьнаан» федеральный программайин дахилнаъди тикмиш апIбанди ву», – аьлава гъапIну Бучаевди.
БицIидарин багъарикан улхуруш, дурарикан 58 «Образованиейин артмиш’вал» госпрограммайин дахилнаъди ГВСУ-4 ФГУП-ди тикмиш апIбанди ву. Имбудариз зиихъ ктуху госпрограммйирин дахилнаъди пул деебтиди.
Ягь’я Бучаевди къайд гъапIганси, гьаму йисан ноябрин эвелариз вуйи улупбариинди, республикайиъ 26 дарамат тикмиш дапIну, гьяракатнаъ тIаъна, гьадму гьисабнаан 3504 ученикдиз деъру йишвар ади 10 мектеб ва 1654 бицIириз гьисаб дапIнайи бицIидарин 16 багъ.
Гьацира, саб жерге дараматар тикмиш дапIну ккудукIну, лазим вуйи документар оформить апIбан гьяракатар гъахура. Сергокъала райондиъ бицIидарин кьюб багъ, Хив райондиъ, Къяйтагъ ва Казбековский районариъ мектебар тикмиш дапIну ккудукIну, лицензия гъадабгъбаз ккилигура.
Совещаниейиъ образованиейин дараматар тикмиш апIру вахтна арайиз гъюрайи, гьял дапIну адру месэлйириканра гъулхнийи. Дицдар читинвалар арайиз гъюрайи тикилишарин гьякьнаан муниципалин образованйирин главйирин мялуматарихъ хъпехънийи.
Аьбдулпятягь Амирхановди шагьрарин ва районарин главйирин, гьюкмин тялукь органарин гъуллугъчйирин фикир, образованиейин дараматар улупнайи вахтназ тикмиш дапIну, ишлетмиш’валиъ тIаъбан бадали, лазим вуйи вари уьлчмйир кьабул дапIну ккунивалихьна жалб гъапIнийи.
