9-пи ноябриъ ТIаттларин гъулаъ яркьу серенжем кIули гъубшну. Думу ТIаттларин кьялан мектебдиз Алаудин Къазиевдин ччвур тувбахъди ва дугъаз гьюрматнан тахта абццбахъди аьлакьалуди тешкил дапIнайиб вуйи.
Серенжемдиъ иштирак гъахьи Табасаран райондин главайин заместитель Рамис Уьсмановди ТIаттларин гъулан жямяаьт дурарин мектебдиз Алаудин Къазиевдин ччвур тувбахъди мубарак гъапIнийи. Гьацира дугъу гьадму йигъан мектебдин гьяятдиъ ТIиварин, Ярсарин ва ТIаттларин мектебариъ урхурайидарин арайиъ спортдин жюрбежюр жюрйириан кIули гъушу талитариъ гъалиб гъахьидар гьюрматнан грамот-йир, медалар ва жара пешкешар тувбиинди лишанлу гъапIну.
ТIаттларин кьялан мектебдин директор Шагьзада Аскендеровайи уч духьнайидариз Алаудин Къазиевдин уьмрикан ктибтнийи: «Гьюрматлу хялар, гъуландар, гъарашугъар, урхурайидар! Гъи, 9-пи ноябриъ, ихь гьаргандиз кIваинди гъубзру гьядиса кIули гъябгъюра – ТIаттларин мектебдиз, чан ляхнин вазифйир тамам апIури, вахтсузди кечмиш гъахьи, Кьягьялвалин ордендин сагьиб Алаудин Къазиевдин ччвур тувну ва дугъаз гьюрматнан тахта ачмиш гъапIну.
Гъи ухьу ТIаттларин жилиин бабкан гъахьи игит Алаудин Къазиевдин рюгьнахьна вуйи гьюрмат уьбхюз уч духьнахьа.
Къазиев Алаудин Надирович 1971-пи йисан 6-пи февралиъ Табасаран район-дин ТIаттил гъулаъ Надир Шафиевич ва Къистаман Абасовна Къазиеварин хизандиъ бабкан гъахьну. 1977-пи йисан дугъу ТIаттларин кьялан мектебдиъ урхуз хъюгъну, 1979-пи йис’ан 1987-пи йисазкьан ТинтIарин кьялан мектебдиъ урхури гъахьну.
Зегьметнан рякъ 1988-пи йисан Табасаран райондин РТП-йиъ слесарди лихбалан ккебгъну. 1989-1991-пи йисари СССР-ин армияйин жергйириъ гъуллугъ апIури гъахьну. Армияйиан гъюблан кьяляхъ, думу Хючна гъулаъ айи «Ватан» кIуру заводдиъ гъилихну.
1993-2003-пи йисари Алаудин Къазиевди Мягьячгъала шагьриъ УВД-йин сабпи батальондин 2-пи полкнан ППСМ-дин 2-пи ротайин сабпи взводдин командирин заместителди ляхин апIури гъахьну. Думу 2003-пи йисан 6-пи сентябриъ сяаьт йицIубдин гьацIаъ, Мягьячгъала шагьриъ Республикайин хамранна венерологический больницайиъ чан гъуллугънан вазифйир тамам апIурайи вахтна, экстремистарин хилариан гюллйир куркIну, али йишв’ин гъакIну. Дугъан хизандиъ хпирна кьюр бицIир гъузнийи – 9 йисаъ айи ришна шубуд йисаъ айи бай», – гъапнийи Шагьзада Аскендеровайи.
Серенжемдиъ, улихьди ТинтIарин кьялан мектеб-дин директорди гъилиху Низамудин Уружевра уду-чIвну гъулхнийи. Дугъу чпин гъулан кьялан мектебдиъра му касдиз бахш дапIнайи саб мурччв гьязур апIруваликан гъапнийи.
Мяракайиъ гьацира гьаму гъулан агьали, меценат Айваз Рамазанов, Табасаран райондин ТОКС-дин кIулиъ айи Аьбдусалам Асланов, Табасаран РОВД-йин начальник Насир Ягъибегов, А.Къазиевдин гъуландар, дугъан дустар удучIвну гъулхнийи.
Серенжемдиъ ТIаттларин кьялан мектебдиъ урхурайи баяр-шубари концертдин программара улупнийи. Аьйшат Рамазановайи, гьаму серенжемдиз тялукь вуди, Эльмира Аьшурбеговайин гафариз вуйи пашман мяълира гъапIнийи.
Алаудин Къазиевдин абйир-бабари серенжемдиз уч духьнайи вари касариз аьхю чухсагъул мялум гъапIнийи.
