Гъи Табасаран театрихъ юкIв хъайи ихь ватанагьлийирин арайиъ Бикаханум Ражабовайин ччвур аьгъдру кас адаршул. Табасаран театрин сягьнайиин ляхин апIури, дугъан 14 йис ву. Бикаханум Агъакеримовна сягьнайиина гъафи вахтна, спектаклиз лигуз дуфнайи тамашичйириз дугъахъди вуйи гьарсаб гюрюш аьхю машкварси шулу.

 

Гьаму улихьнаси Дагъ. Огни шагьриъ гъабхьи «Сижар» кIуру спекталин кьяляхъ, узу Бикаханум Ражабовайихъди гюрюшмиш гъахьунза ва ду-гъахъди чав театриъ гъабхурайи ляхнин гьякьнаан сюгьбат гъубхунза.

– Бикаханум, гъи уву табасаран тамашичйирин арайиъ варитIан ккуни актер-дишагьлийирикан сар вува. Уву фици театриз гъафнуш, газат урхурайидариз кидибт.

– Гьелбетда, фукьан ужуб ният гъапIишра, эгер инсандин ляхнихьна вуйи аьшкь ва бажармиш’вал адарш, дугъу сягьнайиин апIурайи ляхин кIулиз удудубчIвур.

Узу сабпи ражну сягьнайиина удучIвру вахтна, жвуву жвуваз гьамциб суал тувунза: «Гьаз узу сабпи йишв’ин хьидар?». Му инсандин бахилвал дар, хъуркьувалар гъазанмиш апIбаз айи ниятнан лишан ву. Гьеле бицIидимиди му ляхнихьна гьевес айир вуйза. Хъа йиз гъапIу кьастра тамам гъабхьнийиз.
Узу Гъяякент райондин Дружба гъулаъ аьхю хизандиъ бабкан гъахьунзу. Мектеб ккудубкIбалан кьяляхъ, Дер-бент шагьриъ компьютерин курсар дурхну, Табасаран театриъ ляхниъ учIвуз чалишмиш гъахьиза. Узу душваъ фунуб ляхин апIузра гьязур вуйза, йиз метлеб – кьаст дапIнайи ляхнихьна багахь хьувал вуди гъабхьнийиз.

Табасаран театриъ йиз пишекарвалин ляхин 2007-пи йисан ккебгъунза ва гъийин йигъаз хайлин спектаклариъ иштирак духьназа. «Удрида хала» кIуру спектаклиъ аьхю роль уйнамиш апIбиинди узу театрин тамашачйириз гьаммишандиз машгьур гъахьунзу. Сабпи ражари удучIвурайивализ дилигди, спектаклиз лигурайи тама-шичйир узухъ хъугъуз гъитри, спектаклиъ шулайи гьядиса гьякьикьатдиъ гъабхьибси улупнийза. Ва пишекарвалин рякъюъ узхьан удукьурайи хъуркьувалар гъяркъиган, саб бицIи вахталан узкан театрин ужур аьртист шул дупну, фикир гъафнийиз. Гьаци гъабхьнура ву. Хайлин жара спектак-лариъ иштирак шули, сабпи ва асас ролар уйнамиш апIури гъахьунзу. Спектаклариз гъюрайи тамашичйири, узу роль уйнамиш апIураш вая апIурадарш аьгъю апIури шулу. Узу йиз тяриф апIури адарза, амма театрин гьарсар тамашичийин юкIв али артис-тар шулу.
Спектаклариъ театрин ужударстар артистари ролар уйнамиш апIура. Учу сягьна-йиин яратмиш дапIнайи образариинди залиъ деънайидарин юкIвар чIиргуз гьитрача.
Чухсагъул пуз ккундузуз ич спектаклариз текстар дикIурайи писателаризра: Эльмира Аьшурбеговайиз, Кюребег Мурсаловдиз, Жамбулат Гьябибовдиз ва гьацира ихь артистариз.

– Уву гъи мяълийиринра ужур устад вува. Му ляхнихъна фици гъафунва?

– Узу спектаклариъ иштирак шулайи вахтна, сягьнайиин апIурайи халкьдин мяълийирихьна, искусствойихьна ва аьдатарихьна вуйи йиз маракьлуваликан аьгъю дубхьну, ихь театриъ айи пешекрари узуз мяълийир апIуз теклиф гъапIну.
Узу бицIи вахтналанмина мяълийир апIуз ккунир вуйза. Ва театриъ му кьастра тамам гъабхьнийиз. Инсанариз шадвал тувуб – гьадмура саб аьхю вуйи уж’вал ву.
Йиз юкIв шад апIрудар, узуз кьувват туврудар узу ккуни тамашичйир вуйиз.