РФ-дин Правительствойи, уьлкейин вари мектебар 2022-2024-пи йисари интернетдин сетдик китIбан ва дурариз гьюкуматдин мялуматарин гъурулушарикан хатIасузвалиинди мянфяаьт ктабгъуз мумкинвал тувбан бадали, 37 млрд манат жара апIиди. Мидкан проектдин гьякьнаан РФ-дин Правительствойи кьабул дапIнайи къарарнаъ дупна.

 

 

Документдиз асас вуди, 2022-пи йисан мектебариз гьаму метлебар хъуркьуз 6,037 млрд манат, 2023-пи йисан – 11, 666 млрд, 2024-пи йисан – 19,296 млрд манат жара апIиди. Гьадму саб вахтна варитIан аьхю кьадарнаъди пул деебтурайи субъектар Башкортостан (1,8 миллиарддихьна), Дагъустан (1,116 млрд), Краснодарин край (1,092 млрд) ву.

Регионариз жара апIурайи субсидйирин кьадар, уьмуми образованиейин вари тешкилатар интернетдихъди тямин апIбан бадали, 24 порт хъайи коммутаторар фукьан лазим вуш, гьаддикан асиллу шула. Мектебарин гьар кьюб кабинетдиз Wi-Fi-йин саб точка гьисаб апIури, интернет зигбанди ву. Гьаци гьарсаб мектебдиз асккан гьисаб саб коммутатор лазим хьибди.