2022-пи йисан Дагъустандиъ образование тувру «Сириус» жюрейин центр ачмиш апIбанди ву. Гъюру йисан «Альтаир» центриъ 320 касдиз йишв ади аьгъювалар гъадагъру дарамат ва 240 касдиз йишв айи общежитарин кьюб дарамат тикмиш апIуз хъюгъди.

 

Республикайин бажаранвал кайи бицIидариз ва живанариз 2022-пи йисан думу ачмиш апIруваликан РД-йин илмин ва образованиейин министерствойиъ мялум гъапIну. Му центриъ бицIидарин ва живанарин удукьувалар ахтармиш ва артмиш апIуз мумкинвал хьибди.

«Образование» милли проектдин дахилнаъди думу центр аьгъювалар гъадагъбанна лабораторияйин гьамусдин деврин алатарихъди тямин апIбанди ву.

Мидиз улихьна мялум гъапIганси, Урусатдин Президент В.Путиндин табшуругъниинди, «Сириус» жюрейин образование тувру центрар уьлкейин вари субъектариъ ачмиш апIуз планламиш дапIна. Дурарин метлеб – илмин, искусствойин, спортдин цирклариъ ва гьацира техникайин яратмиш’валиъ, проектар гьязур апIбан ляхнариъ ужудар удукьувалар улупу баяр-шубариз гьюкуматдин терефнаан кюмекнан хил гьачIабккувал ву.

Владимир Путиндин жягьтлувалиинди мициб жюрейин сабпи центр «Сириус» 2015-пи йисан олимпиадайин дараматарин бинайиин Сочийиъ ачмиш гъапIнийи.