Улихьнаси Дагъустандин Глава Сергей Меликовдин регьберваликкди республикайин муниципальный образованйириъ спорт артмиш апIбан месэлйириз бахш дапIнайи совещание гъабхьну. Асас улхуб футбол артмиш апIбакан вуйи.
Мялум вуйиси, Дагъустандиз – спортдин республика кIури шулу, фицики йицIбариинди дагъустандин спортсменари вари дюн’яйин майднариин ихь кьудратлу уьлке машгьур гъапIну ва апIура. Дагъустандин тренерари кIуруш, чпин ччвурар спортдин тарихнаъ гъизилин гьярфариинди гъидикIну. Анжагъ Токиойиъ кIули гъушу Олимпиадайин ва Паралимпиадайин тамшириъ дагъустандин спортсменари 11 медаль гъазанмиш гъапIну, гьадму гьисабнаан 4 – гъизилинра. Мициб улупуб, Сергей Меликовдира къайд гъапIганси, РФ-дин саб субъектдиъкьан гъабхьундар.
Гьаддихъди сабси, республикайиъ, дамагъ апIуз гъитру гьяракатарси, къурхулувал арайиз хурайидарра цIиб адар. Улхуб наркотикариз аькси ва террориствалин гьяракатариз аькси комиссйири гьял апIурайи месэлйирикан гъябгъюра. Наркоманияйи ва экстремизмди жигьилариз – республикайин аку гележегдиз аьхю къурхулувал арайиз хура. Дурариз вариди сабишв’инди аьксивал улупбан бадали, аьхю шулайи насил тербияламиш апIбаз, спортдиин, физический культурайиин машгъул апIбаз асас фикир тувну ккунду.
«Ухьу кIурадархьа, вари жигьиларикан пишекар спортсменар кадаъну ккунду кIури. Анжагъ дурар чпин сагъламвал мюгькам, хасиятнан ужударстар терефар артмиш апIбиин машгъул хьпан бадали, тялукь шартIар яратмиш дапIну ккунду. Гьадму саб вахтна, дурарин хусуси удукьуваларра гьисабназ гъадагъну, артмиш дапIну ккунду»,
– гъапну республикайин Главайи.
Сергей Меликовдин гафариинди, футбол жанлуди артмиш апIуз республикайиъ вари мумкинвалар а: девлетлу тарих, адлу ччвурар, пишекрар ва фила-вуш тикмиш гъапIу инфраструктура.
Жюрбежюр вахтари СССР-ин ва Урусатдин чемпионатарин лигйириъ Дагъустандиан футболин 10 командайи иштирак’вал апIури гъахьну.
Гъи республикайин футболин «Динамо» (Мягьячгъала), «Анжи» (Мягьячгъала), «Легион-Динамо» (Мягьячгъала) клубари Урусатдин пишекарвалин футболин лигайиъ футбол уйнамиш апIура.
Урусатдин Федерацияйиъ футбол артмиш апIбан гьякьнаан» подпрограмма уьмриз кечирмиш апIури, футболин 10 аьхю майднар ачмиш дапIна, 100-тIан артухъ бицIи майднарра ишлетмиш’валиъ тIаъна. Гьадди гъи футбол республикайин шагьрариъси, районариъси, гъулариъра артмиш шулайивал субут апIура. Думу уйнамиш апIурайи жигьиларин ччвурар гъюру деврин машгьур футболистарин сиягьнак шлубдин шак гъубзрадар.
Сергей Меликовдин гафариинди, му месэлйир гьял апIбан бадали, муниципалитетарин иштирак’вал чарасуз лазим ву, фицики жигьилариз аьхю футболихьна вуйи рякъ ккиврайидар иллагьки футболин гьадму бицIи майднар ву.
