Гъулахъ ужуб рякъ-хул хьувал, шаксуз, аьхю девлет ву. Фицики рякъярин мюгькамвали йишвариин яшайиш ккабалгбаъ аьхю роль уйнамиш апIура. 

 

 

Аьхиримжи йисари Хив райондиъ рякъяриин хайлин расвалин ляхнар тамам гъапIну. Гъябгъюрайи йисанра му жигьатнаан саб жерге ляхнар башламиш дапIна. Гьаци, ЗахитI ва Асккан Ярак гъуларин кючйириин асфальт улубзну, Арчугъна гъягъру рякъюъ деврин тIалабариз жаваб туврайи, фунуб жюрейинра машинарихьан хатIасузди лихуз шлу 32 метр ярхишин али рукьан (САРМ-йирин) гъяд иливбан ляхнар аьхирихъна гъюра.

Дидланра савайи, улупнайи вахтназ РД-йин транспортдин ва рякъярин мяишатдин министерствойин «Йиз Дагъустан – йиз рякъяр» метлеблу программайин бинайиинди, Хив гъулаъ учIвруган алабхъурайи гъяд рас апIбан ляхнар егин еришариинди тамам апIура. «ТрансСтройНур» тикилишчивалин тешкилатдин вакилари гъядун асас плитйир, гъирагъдихъди дивнайи блокар дигиш апIура.

Хив райондин глава Ярмет Ярметовди къайд апIурайиганси, улупнайи ляхнар тамам апIбаъ республикайин кIулиъ айидарин хайлин кюмек гъабхьну.

– Улупнайи гъядар хатIалу гьялназ дуфнайивалин гьякьнаан учу швнуб-саб ражари жавабдар министерствйириз кагъзар хътаунча. Лазим вуйи ахтармишар гъахбан кьяляхъ, Хивна гъюру гъяд рас апIбан къарар адабгъну. Хъа Арчугъна вуйи гъядкан гъулхиш, дидик рас апIуз саб жюрейинра гьял кимдрувалиан душв’ин рукьан гъяд иливувал важиблу вуйи. Улупнайи ляхнар тамам апIбаъ райондиз кюмек туву гьарсар касдиз райондин вари жямяаьтлугъдин терефнаан чухсагъул мялум апIураза, – гъапну дугъу.