Сач, республикайиъ коронавирусдин уьзур тарабгъбахъди аьлакьалу вуди, Дагъустандиъ яшамиш шулайи агьалйир, хулаъ дусну имиди, чпин жюрбежюр игьтияжар «Госуслуги» порталин кюмекниинди гьуркIуз мажбур гъахьну. Гьаддидихъан мина му порталихьна илтIикIрударин кьадар швнуб-саб ражари артухъ дубхьна.
Аьхиримжи вахтари Дагъустандиъ «Госуслуги» портал фици ишлетмиш апIураш, Му месэлайиз бахш дапIнайи конференцияйиъ республикайин махлукьатлу дакьатарин журналистариз РД-йин цифрайин армиш’валин министрин сарпи заместитель Рамазан Аьбдуллаевди ктибтну.
«Ихь уьлкейин Президентдин къарарниинди, 2030-пи йисаз агьалйирин ккуни вари гъуллугъарин 95% «Госуслуги» порталиан, чиб агьалйири хулаъ дусну имиди тамам апIруганси, ляхин албагну ккунду. Гъийин йигъаз порталиан вари Урусатдиъ яшайишдин мяна айи 169 гъуллугъ гьуркIра. Гьадму кьадарнакан 2024-пи йисаз 101 гъуллугъ ихь региондиъра гьуркIруганси планламиш дапIна. Хъа ццийин йисан аьхириз Дагъустандиъ «Госуслуги» порталиан 85 гъуллугъ гьуркIуз хьибди.
Эвелиан, порталихъди ужуди таниш дарувализ лигну, агьалйириз ляхин апIуз лап гъагъиди вуйи. Гьамус думу ляхинра рягьят дубхьна. Лазим вуйи идарайиз душну аьрза тувруган, артухъди вахт гъябгъюра, мидланра гъайри, хайлин кIажарра уч дапIну ккунду, хъа му порталин ляхин цIиб жараси ккабалгнайиб ву. Эгер уву, «Госуслуги» порталиан яв гъуллугъ гьубкIбан бадали, душваъ улупнайи документар ацIну, аьрза тувиш, имбу ляхнар, лазим вуйи справкйир, порталиан аьрза тувнайи идарайи чав уч дапIну, вари документар тартибра дапIну, улупнайи вахтназ увуз жавабра гъюру», – ктибтнийи Рамазан Аьбдуллаевди.
Гъи медицинайин хайлин гъуллугъар, асас вуди духтрихьна гъягъбан вахт улупнайи нубатнан кIаж гъадабгъувал, бицIидар айи хизанари чпиз тувну ккуни пособйир дюз алаъру кIажар гьязур апIувал, налогар тувувал «Госуслуги» порталиан тина гьуркIуз шулу.
РД-йин цифрайин артмиш’валин министерствойин улихь йисандин аьхириз яшайишдин мяна айи гъуллугъарин 100% электрондин жюрейиинди, «Госуслуги» порталиан мина гьуркIувалин месела дивна. Ва гьамусдиз 40 йигъандин арайиъ гьуркIрайи гъуллугъар, гьаму жюрейиинди аьрза тувруш, 20 йигъандин арайиъ гьуркIди.
