Урусатдиъ перепись гъабхбаан Хив райондиъ Росстатдин жавабдар пишекар Имамудин Агъабаевдин гафариз асас вуди, Хив райондиъ ноябрин 15-пи йигъаз агьалйир гьисаб апIбан ляхин ужуб дережайиъди кIули гъубшну.

 

– Му жигьатнаан ляхин лазим дережайиъди кIули гъабхувал метлеб вуди, райондиъ вахтназ улихьна инсанар гьисаб апIбан бадали, 6 участок тешкил гъапIну. Дурарилан савайи, хулаз жавабдар касар гъушишра, йишв’ин даршлу ватандашар гьисабназ гъадагъбан бадали, райондиъ МФЦ-йин бинайиинди стационарин участокра ляхник кипну. Улупнайи муддатнаъ Хив райондин вари агьалйир гьисабназ гъадагъбан бадали, гъулариъ 38 жавабдар касди зегьмет гъизигну. Дупну ккундуки, вари Урусатдиъси, Дагъустандиъра «Госуслуги» порталиан мина перепись гъабхбан ляхин  кьувватнаъ ипну, амма гъуларин агьал-йирин асас пай инсанар яшлу касар вуйивал гьисабназ гъадабгъну, зиихъ къайд дапIнайи 38 переписчик саки гьарсар касдин гьяятдиз гъягъюри, лазим вуйиси ляхин ккабалгну. Уьмуми гьисабариз асас вуди, Хив райондин агьалйирин кьадарну 22400 кас тяйин апIура. Мурар гьелелиг аьхиримжи улупбар дар, – гъапну дугъу.