Ноябрин 13-пи йигъан Каспийск шагьриъ ерлешмиш дубхьнайи «Анжи Аренайин» аьтрафариин Дагъустан Республикайин туризмдинна халкьарин художествойин сяняаьтарин министерствойи ва республикайин алверинна инвес-тицйирин Агентствойи сатIиди гьар йисан тешкил апIурайи «Open Dagestan – 2021» кIуру аьхю форум кIули гъубшну.
Форумдиъ республикайин правительствойин, тялукь министерствйирин вакилар, туризмдин цирклиъ лихурайи пишекрар ва хайлин жара касар иштирак гъахьнийи.
Мидланра гъайри, ихь республикайихъди сатIиди туризмдин циркил артмиш апIбан метлеб ади, форумдиз гьятта жара регионарианра туризмдин циркил артмиш апIурайи касар гъафнийи.
Форумдин дахилнаъди республикайин вари муниципалитетариан культурайин отделарин пишекрари чпихьди хьади гъафи халкьдин сяняаьтарин яркьу выставка-ярмаркара яратмиш дапIнайи. Дидиъ Табасаран ва Хив районариан духнайи алатарра улупнийи.
Форумдин 1000-тIан артухъ иштиракчйириз, асас вуди жара регионариан дуфнайи хялариз, Дагъустандин халкьарин хурагарихъди, табиаьтдин утканвалихъди, халкьдин сяняаьткарвалин шей’арихъди, гьюлин гъирагъдихъ ва дагълу терефариъ туризм артмиш апIурайи инвестицйирин проектарихъди таниш хьуз мумкинвал гъабхьну.
«Му форум тешкил апIбан асас метлеб – республикайиъ артмиш шулайи туризмдин цирклик артухъси гьевес капIувал ву. Циркил ужуди артмиш апIуз ухьуз мумкинвалар ахьуз. Гизаф туристар гъягъюрайи Урусатдин кIакIначи регионарин арайиъ багарихьди ихь Дагъустанра хьибди кIури, умудлу вуза»,
– гъапну форумдиъ иштирак гъахьи республикайин туризмдинна халкьдин художествойин сяняаьтарин министрин вазифйир тамам апIурайи Эмин Мердановди.
Форумдин иштиракчи, Дербент шагьрин туризмдин артмиш’валин центрин пишекар, ихь ватанагьли Марат Ибрагьимовди «Табасарандин нурар» газатдиз му серенжемдикан вуйи чан фикрар ачухъ гъапIну.
«Каспийск шагьриъ кIули гъубшу туриствалин форумди республикайиъ артмиш шулайи туризмдихъди таниш хьуз варидариз мумкинвал тувну. Магьа учура форумдиъ халкьдин сяняаьтарин ва Дербент шагьрин туризмдиз айи мумкинваларин саб бицIи выставка тешкил гъапIунча.
Аьхиримжи йисари туризмдин циркил артмиш апIбаан Дагъустан Республика лап улихь дубшна. Туристар хъади гъягъру цIийи йишвар ачмиш апIура. Гьацира йигълан-йигъаз республикайиъ хялар кьабул апIру хуларин, гостиницйирин кьадарра артухъ шула. Яна туристар кьабул апIувал ва дурариз гъуллугъ апIувал сарун ужуди гьязур дубхьна, пуз шулу. Гьамусяаьт республикайиъ туристар хъади гъягъру ужудар терефар гьязур апIура. Республикайиъ туризм арт-миш шулайивалин гъавриъ айи касарра районариъ артухъ шула. Гьятта гьамус дурарихьан, чпи яшамиш шулайи гъулариъра уткан йишвар улупури, ицци хурагар гьиври, дахъру йишвар гьязур апIури, мидиз улихьна йисаритIан гьамус швнуб-саб ражари ужуди туристар кьабул апIуз шулу.
Форумдиъ чпи гьязур дапIнайи проектар хьади, муниципалитетарилан гъайри, хялар кьабул апIру хуларин, туриствалин фирмйирин улихь-кIулихь хьайидари иштирак’вал гъапIувалиин узу гизаф рази гъахьунза. Хъа форумдин варитIан асасуб гьадму вуйики, диди му цирклиъ ляхин апIурайидариз чиб-чпихъди таниш хьуз, сари-сариз насигьятар тувуз, чпин фикрар ачухъ апIуз аьхю мумкинвал тувну. Йиз фикриан, гъийин йигъан саб цирклиъ лихурайидарин арайиъ аьлакьйир адарш, думу циркил ужуди артмиш шулдар. Мисал вуди гъадабгъиш, эгер саб туроператорин машин гьубкIну адарш, ясана гидарин кьадар цIиб вуш, дугъхьан жара турагентствойиан вахтназ вуди машин гъадабгъуз, ясана, дих дапIну, гид хъади гъюз шулу», – къайд гъапIну Марат Ибрагьимовди.
Дупну ккундуки, ццийин форум, улихьна йисариси дарди, жара саягъниинди кIули гъубшну. Му ражари асас фикир туризмдин цирклиз тувнайи. РД-йин Глава Сергей Меликовди правительствойин, тялукь министерствйирин ва жавабдар идарйирин улихь асас вазифаси гьамусяаьт республикайиъ туризмдин циркил артмиш апIувал дивна. Аьхиримжи вахтна, коронавирусдин уьзур тарабгънайивализ ва харижи уьлкйир хъяркьнайивализ лигну, Дагъустандиз гъюрайи туристарин кьадар артухъ шула, гьаддиз му цирклиъ ляхин апIурайи кьялан ва бицIи дилаварчйириз кюмек апIбан бадали, хайлин серенжемар кIули гъахура.
«Open Dagestan – 2021» форумдин асас пай аьхирихъна гъюбан кьяляхъ, му серенжемдиз республикайин жюрбежюр районариан дуфнайи культурайин отделарин коллективари, форумдин мяракайиъ халкьдин мукьмар йивури, ялхъвнар апIури, дид’ин шадвалин аьхю мешреб алапIнийи. Форум Дагъустандин машгьур артистари концерт улупбиинди ккудубкIну.
Шиклиъ: выставкайиз адагънайи халачйир ва дуркьар.
