Сагъламвал уьбхбан цирклиъ 60 йисан гъилихну

 

 

Дагъустандиъ, асас вуди дидин кьибла районариъ, Жамалудин Зиявудинов адлу хирургарикан, травматологарикан, ортпедарикан сар вуйивал узу кIваантIан тасдикь апIураза. Гьеле мектеб ккудубкIайизра, дугъан кIваъ гележегдин кесп тяйинди вуйи:абайи дугъаз духтир хьуз ижми насигьят тувнайи. «Дюн’яйиъ айи пишйирикан варитIан рягьимлуб, варитIан инсандин гъайгъушнаъ шлуб духтурвал ву, гъапнийзуз йиз абайи», – кIваин апIура гъи Жамалудин Гьяжимурадовичди. Думу гафариин фуж рази дархъа, инсандиз чан сагъ’валтIан аьхю девлет айин?

 

Жамалудин Гьяжимурадович Зиявудинов 1932-пи йисан Табасаран райондин АхьитI гъулаъ бабкан гъахьну. Дугъу кьялан образование Хючнаъ гъадабгъну. 1951-пи йисан Дагъустандин гьюкуматдин медицинайин институтдик урхуз кучIвну, Жамалудин Гьяжимурадовичди 1957-пи йисан думу ужудар аьгъювалариинди ккудубкIну. Жигьил пишекар дишлади Хив райондин больницайин кIулин духтирди дерккру. Шубуд йисан душваъ ляхин дапIну, Жамалудин Зиявудинов Табасаран райондиз кIулин духтрин санитарияйинна эпидемияйин месэлйириз лигру заместителди лихуз гъюру. Кьюд йисан думу вазифйирра тамам апIбан кьяляхъ, думу кьюд йисазди Ленинграддиз гъягъюру: душваъ Г. И. Турнердин ччвурнахъ хъайи институтдиъ травматологияйиан ва ортопедияйиан ординатурайиъ урхури гъахьну… Душваъ дугъу Раухфусдин ччвурнахъ хъайи больницайиъ хирургияйин, туберкулездин, травматологияйин отделен-йириъ ляхин апIури гъахьну. Гьадму вахтна насигьятчйири дугъаз илимдин ляхниин машгъул хьуз теклиф гъапIнийи. Жамалудиндиз илимдин ляхниин машгъул хьузра ккундийи, амма аьхириъ дугъу багъри райондиъ хирургди лихуз кьаст гъапIнийи.

Гьамус сарун яркьу профилин хирург Зиявудинов Дербент шагьрин больницайиз гъюру. Жиниб дар, думуган республикайин районариъ деврин тIалабариз жаваб тувру больницйир гьелелиг адайи. Асас вуди гъагъи уьзрариз лигбан жавабдарвал Кафари Дагъустандиъ – Мягьячгъалайиъ, хъа Кьибла Дагъустандиъ – Дербентдиъ айи больницйириин ва пишекрариин дийибгънайи. Шубуд йисан Жамалудин Зиявудиновди Дербентдиъ думу вахтназ хас дарударстар читин ва жавабдар операцйир варжариинди гъапIну…
Аьхирки, сарун заан категория-йин пишекрар районаризра лазим вуйи вахт улубкьуру. Жамалудин Гьяжимурадовичдиз, гьелбетда, фунуб йишвазра гъягъюз, гьятта Дербентдиъ гъузузра аьхю мумкинвалар айи. Хъа чан багъри Табасаран райондиз гъюз теклиф гъапIган, дугъу думу мумкинвалар гъеерцундар…

Думу вахтна Табасаран райондиъ духтрарин аьхю тIалабра айи. Вари райондиъ айидар 18 духтир вуйи. Табасаран райондиз гъафиган, Жамалудин Зиявудинов 1965-1970-пи йисари ЦРБ-йин кIулин духтирди лихуру. Думу йисарихъди фу аьлакьалу ву? Уьмуми гьисабниинди гъадабгъиш, райондиъ агьалйирин сагъламвал уьбхювал деврин тIалабариз жаваб тувруганси тешкил апIбан вари ляхин. Гьаци, учв дуфну цIиб вахт гъябгъяйизра, Жамалудин Зиявудиновди райондин больницайиъ хусуси метлеб айи 7 отделение арццру. Макьала урхрударин фикирназ: туберкулездин отделение ухдихъанмина гьяракатнаъ имдар. Аьхю наслариз мялум вуйиганси, гъийин ихь больницайин асас дараматарра ккудушу аьсрин 1966-1968-пи йисари, яна Жамалудин Зиявудинов кIулин духтир вуйиган, тикмиш гъапIдар ву. Дугъу кIулин духтрин вазифйир лап ихтибарлу хилариз (РФ-дин ва РД-йин лайикьлу духтир Мирзамягьямед Мягьямедовдихьна) тувну, хъа учв хирургияйин отделениейин заведующий шулу. Му гъуллугънаъ думу 42 йисан (2017-пи йисазкьан) гъилихну. Хъа учв хирургияйин ляхниин бегьемди машгъул хьувал райондин гизаф агьалйириз гьаму ярхи девриъ савкьатси гъабхьну. Гьадму йисари дугъу инсанариз кюмек, сагъ апIбан, бязи вахтари аьжаликкан ккадагъбан дюшюшар цIиб гъахьундар. Хъа, кIури шулуки, духтриз варитIан асасуб – дугъан кюмекниинди сагъ гъахьидарин чухсагъул, дурарин гьюрмат ву. Му касди 10 агъзуртIан артухъ операцйир дапIна. Операцйир апIру йи-гъари гьар йигъан хьуб операция апIру вахтарра алахьури гъахьну. Дугъахьна Дагъустандин шагьрариан ва жара районариан, хъа гьацира Чечняйиан операцйир апIуз аьзарлуйир гъюри гъахьну. Йишвну даахнайи вахтнара му кас гьялалди гъитри гъахьундар, нивкI’ан хъиригну, операцйир апIуз хъади гъягъюри.

Лизи халат алабхьну саки аьсрин гьацIан муддатнаъ ляхин апIруган, Жамалудин Гьяжимурадович гьарган чан аьгъювалар за, пишейин деринар ахтармиш апIбиин гъилихну. Гьадму гьисабнаан думу йицIбариинди ражари пишекарвалин дережа за апIбан курсариъ, командировкйириъ гъахьну. Дугъаз райондин, республикайин ва уьлкейин дережйирин тялукь органариан вуйи гьюрматнан грамотйир, «СССР-ин сагъламвал уьбхбан отличник» лишан ва жара наградйир а; думу Дагъустан Республикайин лайикьлу духтир, РФ-дин сагъламвал уьбхбан отличник ву. Му касдиз Урусатдин Президент В.В. Путиндихьанра швнуб-саб гьюрматнан кагъзар а. Машгьур хирург Аьхю Гъалибвалин 60 йисандин, 63 йисандин ва 65 йисандин юбилеяриз тувнайи медаларин сагьиб ву. Думу сагъламвалин цирклиъ 60 йисан гъилихну.

Жамалудин Гьяжимурадовичди жямяаьтлугъ табшуругъарикканра гьич сабанкьан кIул ккадабгъундар. Думу швнуб-саб ражари райондин Советдин депутатди ктагъну, жара жямяаьтлугъ органарин ва тешкилатарин дахилнаъ ади гъахьну. Жамалудин Гьяжимурадович КПСС-дин член ву, дугъу Марксдинна Лениндин ччвурнахъ хъайи университетра ккудубкIну.
Адлу духтир ужуб хизандин кIулра ву. Дугъу ва чан вахтна райондиъ заан гъуллугъар тамам апIури гъахьи дугъан уьмрин юлдаш Муслимат Рягьмановайи сатIиди 4 велед аьхю ва тербияламиш гъапIну. Дурарикан гьарури чан хизан ккебгъна ва уьмрин гимийиъ чпиз лайикьлу ва халкьдиз вафалу йишвар дибисна.
Сабсан маракьлу тереф – Зиявудиноварин аьхю хизандиъ духтирвалин пише кадабгънайидар гизаф а: дугъан чве, чи, бай, швушв… Йиз фикриан, ав, мушваъ абайин насигьятнан тясирлувал аьхюб гъабхьну. Дурариз варидариз хъуркьувалар ишри!