Аьхиримжи йисари республикайин рякъяриъ аварйирихъди аьлакьалу бедбахтвалин дюшюшар гизаф шула. Дидин гьякьнаан МВД-йин РД-йиъ айи УГБДД-йин кIулиъ айи полицияйин полковник Александр Шалагинди мялуматар тувра. Рякъяриъ машинарин ва инсанарин гьяракатнан хатIасузвал уьбхбахьна республикайин агьалйирин фикир жалб апIувал чарасуз лазим ву.
«КIули гъуху ахтармишари улупурайиганси, 50% авар-йириъ машинар чиб-чпихъ йивура, 22% аварйириъ машинар яягъди гъягъюрайи инсанарихъ хъурсра, 8%-диъ машинар ккитIиркIура, 20%-диъ жюрбежюр жара себебариан аварйир шула», – къайд апIура региондин Госавтоинспекцияйин начальникди.
Машин хъапIуз дудубгъну имбу, машин хъапIуз ихтияр гъадабгъну кьюд йискьан дарударин тахсиркарвалиинди гъахьи аварйирин кьадарра артухъ дубхьна. Александр Шалагинди къайд гъапIганси, ДТП арайиз гъювалин асас себебар: гъаншарди машинар гъюру рякъюз удучIвувал, машин хъапIувалин гьяракат лап артухъ апIувал, рякъяр сатIи шулайи йишварихь рякъюъди гъягъбан къайдйир тамам дарапIувал, ички дубхъну машиндин рулихъ дусувал ва гьацдар жарадар ву.
Гьаму йисан ноябрин ваз кубкIайиз вуйи улупбариинди, республикайиъ рякъюнна транспортдин гьяракатнан 1099 дюшюшар духьна, думу аварйириъ 236 кас гъийихну, 1557 касдиз зийнар гъахьну.
Къайд апIувал лазим вуки, бицIидарин хатIасузвал уьбхбаз артухъ фикир туври ашра, бицIидарин иштирак’вал ади 143 ДТП духьна. Думу аварйириъ чпин яш 16 йис дубхьну адру 8 бицIир гъийихну, 153-риз зийнар гъахьну. Арайиз гъафи 68 аварияйиъ машинарин пассажирар вуйи 87 бицIириз жюрбежюр зийнар гъахьну. Миди машин хъаърудари бицIидар машиндиъди гъахувалин къайдйир тамам дарапIрайивал тасдикь апIура.
«Гьаму жюрейин дюшюшар терг апIбан бадали, рякъюъ машинарин гьяракатнан къайдйир тамам апIбан зиин гюзчивал гъабхбан серенжемар мюгькам апIбанди, пассажирар ва бицIидар гъахбан хатIасузвализ артухъ фикир тувбанди вуча», – гъапну Александр Шалагинди.
Эгер дериндиан фикир гъапIиш, рякъюнна транспортдин аварияйиъ зарар дархьи хизан гьич тек-бирра алабхъури имдар. Гизафси аварйириъ йихурайидар жигьилар ву, машинар хъаъра-йидарра гизафси гьадрар ву. Йиз фикриинди, жигьилари машин хъапIруган, дидик гьяракат капIруган, чпин жигьил уьмрикан, чпиз хулаъ ккилигурайи абйир-бабарикан, жигьил хпирикан, бицIи веледарикан фикир апIури шулдар. Хъа лазим ву.
Ноябрин вазлин 2-пи йигъан Мягьячгъалайиъ Петр Сарпирин ччвурнахъ хъайи кючейиъ аьхю гьяракатниинди хъапIрайи машин рякъюн гъирагъдихъ хъайи гьарихъ гъивну. Шубур жигьил гъийихну, кьюриз гъагъи зийнар гъахьну.
Ноябрин 20-пи йигъан вари Дагъустандин агьалйир Москвайиъ гъабхьи аварияйи мюгьтал гъапIнийи. Машгьур блогер Сяид Губденский, Москвайиъ Кутузовдин ччвурнахъ хъайи кючейиъ машиндин авария дубхьну, гъакIнийи. Ужуб BMW машиндин рулихъ хъайи, машинарик кайи гьарсаб гъиллигънакан мялуматар айи касдин машин, гъаншарди машинар гъюрайи зулизди удубчIвну, Мерседес ва Вольво машинарихъ гъивну. Блогерихъди машиндиъ айи пассажирра гъакIну.
Гьюрматлу жигьилар, машинар хъаърайи вари ватандашар! Ичв ва учвухъди машиндиъ айидарин сагъламвал уьбхбан бадали, рякъюъди машин хъапIбан къайдйир уьрхяй. Думу къайдйир уьмрин ва машин хъапIувалин тажруба айи пишекрари гьязур гъапIдар ву. Лазим дарди машиндин гьяракат за мапIанай. Учву гъягъюрайи рякъюъ гьялак махьанай, табиаьтдин гьавйириз фикир тувай. Рякъ кьяши дубхьнайи вахтна машиндин чархар учвухъ хъпебехъуз мумкин ву. Гьарган ихтиятвал уьбхяй. Ярхла рякъюъ йишвну муучIванай. Фукьан мюгькам сагъ’вал хъашра, инсандиин нивкI алабхъуб мумкин ву. Кьисматнахъди тамшир мапIанай!
