Гьюрматлу ватанагьлийир, ихь «Табасарандин нурар» газат, табасаранаризси, республикайин шагьрариъ, хайлин районариъ дуланмиш шулайи жара миллетарин вакиларизра мялум ву. Газатди гьар гьяфтайиъ думу урхру аьхю кьадар касариз вахтниинди важиблу мялуматар тувра.

 

Республикайин «Табасарандин нурар» газат урхурайидарикан хайлиндар редакцияйин дустар гъахьну, ва дурари гьаммишан газатдиз подписка апIура. Гизаф кьадар инсанари, газатдин нубатнан нумра чапдиан удубчIвайиз ккилигури, дидик чап дапIнайи гьарсаб макьала аьхю аьшкьниинди урхури шулу.

КIул’инди вари Дагъустан Республикайиъ кIули гъягъюрайи важиблу гьядисйириканси, Табасаран, Хив, Дербент районариъ ва Дербент, Дагъустандин Огни шагьрариъ уьмур фици гъябгъюраш, думу районарин ва шагьрарин зигьимлу бицIидарикан, бажаранлу вакиларикан, баркаллуди зегьмет зигурайи гъуллугъчйирикан, кьягьял ватандашарикан, спортсменарикан газатдин машариъ сикин дарди макьалйир чап апIура. Мидланра гъайри, газатдин машариъ Дагъустандин сяргьятарилан тинди Урусатдин жюрбежюр шагьрариъ яшамиш шулайи ихь ватанагьлийири гъазанмиш гъапIу хъуркьуваларихъди таниш хьуз шулу. Жараб дарш, аьхиримжи кьюд йисан газатдин гьарсаб нумрайиъ вари дюн’яйиъ, гьадму гьисабнаан ихь рес-публикайиъра, районариъра, тарабгънайи коронавирусдин тIягъвнихъди аькси женгнаъ айи ихь игит духтрарин, медсестрйирин баркаллу ляхникан варжариинди мялуматар тувна. Мидихъди сабси, районариан вуйи хабрар, гъулан мяишат, культура, тарих, театр, образование ва гьацдар жара цирклар фикир тутрувди гъитрадар.

Йиз макьалайиъ узуз аьдати инсанарихьна, мялимарихьна, мектебарин директорарихьна, тешкилатарин ва карханйирин кIулиъ айидарихьна, районарин ва гъулан поселенйирин главйирихьна, районарин депутатарихьна илтIикIуз ккундузуз.

Гъи «Табасарандин нурар» газатдиз ичв кюмек лазим ву. Газатдин подписка апIру вахт аьхирихъна гъюра. Учвузси, газатдиз подписка апIуз ккунди, амма мумкинвал адру касиб хизанариз, ичв багахьлуйириз пешкеш вуди подписка апIинай.

ЦIийи йис улубкьайиз бицIи вахттIан имдар. Ичв багъри абйир-бабариз, жаради чпин хал-хизан ккебгънайи веледариз пешкеш вуди газатдин подписка апIуз шулу. Ухьуз гъи хабрар гъадагъуз жюрбежюр саягънан хайлин мумкинвал ашра, абйир-бабариз хилиз гъадабгъну урхру газаттIан ужуб пешкеш адар.
2022-пи йисан «Табасарандин нурар» газатдин сабпи нумра чапдиан удубчIвхъанмина 90 йис тамам шула. 1932-пи йисхъанмина газатдиз хайлин читинвалар гъяркъну, дидин хайлин кIулин редакторар ва гъуллугъчйир дигиш гъахьну. Амма дурари, багъри халкьдин сатIи кюмекниинди, гьадму читин йисарианмина гъийизкьан газат гъюбхну. Ихь абйир-бабари гьар йисан подписка апIури гъюбхю газатдик пай кивуз гъи ихь нубатра дуфна. «Табасарандин нурар» газат – му ихь багъри чIал, тарих, кюгьне аьдатар, меденият, ухьуз гъубзнайи савкьат ву. Газатдихьна вуйи вижнасузвал – ихь абйирин тарихдихьна вуйи вижнасузвалик гьисаб ву.

ЦIийи йисан газатдин ляхниъ хайлин дигиш’валар хьиди, бицIидарин, живанарин арайиъ жюрбежюр конкурсар кIули гъахиди, газат урхрударихьан варитIан ужуб макьала, кагъзин натижа, шикларин конкурс ва гь.ж. тешкил апIиди. Улихь ккимиди вари планар ачухъ апIурадарза. «Табасарандин нурар» газат – ихь халкьдин сурат ва халкьдин кьувват ву. Жара халкьарин улихь ухьу ужуз ва зяиф хьуз гъитидархьа. Ихь газат уьбхюрхьа.