Урусатдин Федерацияйин Президент Владимир Путиндин тешкиллувалиинди 2017-пи йисан «Урусат – мумкинваларин уьлке» платформайиин «Урусатдин регьбрар» кIуру проект гьяракатнаъ ипнийи. Думу проектди ватандашарин ва жямяаьтлугъдин образованиейин, кадрйирин, социальный проектар сатIи апIуз ва уьмриз кечирмиш апIуз мумкинвал тувну.

 

 

«Урусатдин регьбрар» проектдин сабпи конкурс 2017-пи йисан октябрин вазлиъ кIули гъубшну. Конкурсдиъ иштирак хьуз ккуни 200 касди аьрз-йир тувнийи. 2018-пи йисан 7-11-пи февралиъ Сочи шагьриъ образованиейин «Сириус» центрин бинайиинди конкурсдин финалин пай кIули гъубш-нийи. Думуган 103 кас гъалиб гъахьнийи. Гьадму кьадарнакан 80 кастIан артухъ жюрбежюр гъуллугъариъ дерккнийи, дурарикан кьюр кас губернаторар, хъа юкьурсана федеральный министрарин заместителар гъахьнийи.

Магьа гьаму йисанра конкурс кIули гъубшну. «Урусат – мумкинваларин уьлке» проектдин дахилнаъди «Урусатдин регьбрар» конкурсдин регионарин арайиъ вуйи талитнаъ Кьибла федералин округдиан 17 кас ва Кафари Кавказдин федералин округдиан 7 кас «Бизнес ва промышленность», «Гьюкуматдин идара апIувал» цирклариъ гъалиб гъахьну. Дурарин арайиъ Дагъустандиан вуйи сар иштиракчи, ихь ватанагьли, РД-йин Главайин ва Правительствойин администрацияйин экономикайин ва финансарин отделин управлениейин начальникдин заместитель Эльнара Исламовара а. «Табасарандин нурар» газатдин редакцияйин коллективди, Эльнара Аьгьмедовна му гъалибвалихъди кIваантIан тебрик апIури, дугъаз чан кIваъ айи мурад-метлебнахъ хъуркьувал ккун апIура. Газатдин гъюру нумрайиъ ич журналистди Эльнара Исламовайихъди гъубху сюгьбат чап апIидича.